究竟公司應唔應該安裝閉路電視，監控員工的一舉一動？這條問題沒有絕對的答案。日前，有打工仔於網上討論區發文，指公司每間房、每個角度都有CCTV，老闆及老闆娘每日留意員工的一舉一動，大呻完全失去自由，和坐監沒有分別。帖文一出，引起網民兩極討論，有人認為老闆的做法有問題，但有網民卻指辦公室裝CCTV的情況十分普遍。
撰文：經一編輯部｜圖片：Unsplash｜原文刊於：經濟一週
打工仔：每間房每個角度都有CCTV完全失去自由同坐監冇咩分別
日前，有位打工仔於香港討論區以「我在一間大約有40人公司做一個小員工，老闆係公司內部裝咗好多CCTV」為題發文，指辦公室內佈滿CCTV，老闆娘會每日會留意員工的一舉一動，形容完全失去自由，與坐監相比沒有分別。當員工走入CCTV盲點位，老闆會馬上致電員工詢問行蹤。該名打工仔更直言，有CCTV並不是問題，問題在於老闆及老闆娘會「成日睇住」。
「每間房每個角度都有，公司內有員工係皇親國戚，老闆娘每天都望住個mon，每天都留意員工一舉一動，完全失去自由同坐監無乜分別，老闆娘仲會zoom大個mon睇吓你電腦做緊乜嘢，老闆當每一個人都當賊扮，其實疑人莫用，用人莫疑。
我非常之唔想再做落去，當員工行到一個CCTV嘅盲位，員工電話會立即響，老闆會打嚟問你做緊乜嘢，而有親戚關係嘅同事立即會出現喺你面前，睇吓你做緊乜嘢有冇偷嘢，佢哋又會check 你係咪偷懶或者偷嘢，勁恐怖，電話有錄音，佢哋扮演上帝角色，完全控制員工一舉一動。」
網民斥樓主小事多怪 做份內事就唔使驚
帖文一出，引起網民兩極回應。有網民表示，辦公室內安裝CCTV並不罕見，形容樓主「小事多怪」。有人更指，只要樓主返工做好分內事，就不應為此而感到憂慮。
- 「樓主真有趣，喺office裝cam有乜咁出奇？好驚畀人見到你係office hour時上鹹網、定驚畀人捉你蛇王/瞌眼瞓？」
- 「鍾意做咪做，唔鍾意做咪辭職囉。今日做夜更保安、通宵更看更，都係閉路電視對住個保安，瞓覺即炒，好多時仲叫日更嘅保安睇CCTV，check夜更保安有無瞓覺。」
- 「我公司都有cam，我做咗十幾年都無咩感覺，同事會蛇王、吹水、傾計、食零食亦無人管 ，老闆唔會成日睇Cam。除非唔見咗貴重嘢，公司辦公室長期放咗鮑魚等…貴價嘢。」
「你唔滿意就唔好做呢份工，你老細裝CCTV有無犯法呀？你返工 唔係做嘢呀？你老細出少啲糧得唔得，同樣你當然唔可以「吞泡」。呢個唔係私穩問題，你唔鐘意就去搵第二份工！」
- 「大把工作，公司係咁。有啲工作，連電話都唔畀跟身。」
- 「樓主少見多怪，以前做政府部門，櫃檯位置有幾枝鏡頭對住，其中一枝，輸入什麼字母都睇到，又有錄音，只要工作上沒有歪念，何來壓力。」
- 「如果返工係做份內事，再多cam都唔驚。樓主感覺唔良好嘅話咪考慮辭職囉。」
- 「如果我是老闆，我會係公司內部裝 CCTV，更準確看看員工的表現，不需要依靠別人來評估員工的表現。公司是老闆的公司，如果你不喜歡 CCTV，你可以找到另一份工作。」
無CCTV 先知咩叫正常？
又有網民分享自己過往的工作經驗，指曾遇過不少公司安裝閉路電視，後來轉到沒有CCTV的公司後，才知道何謂正常。
- 「我個朋友公司都係，公司得4個人，有6部cam，每部電腦都有個cam影住。因為老闆經常不在香港，雖然好似無咩嘢咁，但我朋友做咗幾個月就無做，覺得好無癮。」
「試過聽到老闆話見到個同事用手指轆手機，就話人哋應該係搵緊工。點解連用自己手機嘅自由都無？又同我講公司買你9個鐘，你嗰9個鐘係公司嘅，完全同坐監無分別，話同事唔聽指令，當同事係狗咁訓練，要聽佢指令先可以做。」
- 「我前老闆同一層有幾個單位，加埋超過30個cam，佢間房有大電視睇晒所有cam。而我另一個老闆唔介意員工返工煲劇及打機，所以啲員工好買力，多嘢做要加班都無怨言。」
- 「我以前公司都係咁，個女人日日睇住十幾個mon，驚死有人害佢，但公司又唔見好賺錢，後來轉到𠵱間公司，無CCTV，先知咩叫正常。」
裝CCTCV無問題 問題出自老闆的做法？
雖然有網民指於辦公室內安裝CCTV普遍，但有人同意樓主的講法，直言老闆及老闆娘時時刻刻監控員工的做法有問題。
- 「公司裝cam其實唔係咩怪事，怪就怪在一到死位就電話響。」
- 「有CCTV好正常，但無時無刻睇到實，連你一舉一動，一唔見你就搵你，就真係有問題！」
- 「裝CCTV無問題，老闆日夜望住CCTV咁得閒，呢啲公司執笠多，正常老闆咁得閒，搵生意去搵錢，睇住CCTV會有生意咩？」
網民：樓主你喺監獄嗰度做嘢
然而，亦有網民同情樓主，指充滿閉路電視的工作環境十分恐怖，甚至有人勸他應該辭職。
「你公司都幾奇怪喎，要每間房每個角度都有Cam？你話你老闆娘會zoom大個mon，睇吓你電腦做緊咩？佢返工就係做呢啲？你老闆又當每一個人都係賊扮，你公司賣金銀珠寶㗎？」
- 「點解唔走？」
- 「接受唔到，辭職。」
- 「咁樣返工都幾大壓力。」
- 「樓主你喺監獄嗰度做嘢。」
- 「偷窺癖。」
- 「仲唔辭職走人？」