全民派錢1萬蚊　熊大教你「錢滾錢」理財

《2020年財政預算案》終於出爐，當中最焦點的措施莫過於向所有合資格居民派1萬蚊現金。受新冠肺炎疫情影響，本地百業蕭條，兔兔想好好利用呢筆橫財「錢滾錢」，於是佢就請教理財達人熊大，睇吓1萬蚊可以有咩投資建議。

兔兔：熊大熊大，財爺話向年滿18歲的香港市民派發1萬蚊（兔兔「發錢寒」樣上身）。1萬蚊話多唔多，話少唔少，如果我唔想亂使，可以點好好利用？

熊大：吸收過上次政府派錢的經驗，其實呢筆錢真係唔知幾時先可以去到我哋手。1萬蚊的確唔算大數目，不過如果好好利用，話唔定可以幫補一下疫情期間喺抗疫方面的額外開支。

兔兔：咁究竟1萬蚊可以投資啲咩？

熊大：如果想投資股票市場，要穩陣又要入場費低的選擇真係唔多，最大路的就係內銀股，每手入場費都唔過7,000蚊。早前人行發出定向降準訊號，四大內銀股──工行（1398.HK）、建行（939.HK）、農行（1288.HK）、中行（3988.HK）即刻現吸引力，加上股息率高逾5厘，係「進可攻退可守」之選。而近日內銀股跟住個市回落返唔少，趁低位買入可以唔使擔心「賺息蝕價」的風險㖭！

兔兔：不過我對買股票始終都有陰影。近幾年跟班姨媽姑姐入市，次次都係輸多贏少。

熊大：如果唔想買股票，但又想穩陣，可以考慮買iBond（即政府通脹掛鈎債券）。入場費啱啱好係1萬蚊，票息以過去6個月本地平均通脹率計算，回報約2厘。而政府「包底」保證年利率1厘，可謂「穩賺冇蝕」。iBond係港交所（388.HK）掛牌，方便隨時變現，唔使擺夠3年都可以拎翻啲錢出嚟。

兔兔：之前睇新聞話65歲以上可以買銀債？銀債又係咩嚟，同iBond有咩唔同？

熊大：銀債又稱為長者iBond，65歲或以上的長者就有資格申請，入場費都係1萬蚊，票息同iBond一樣，以過去6個月本地平均通脹率計算。而政府都一樣會「包底」。以最近一期銀債的派息記錄去睇，年息率達3.23厘，仲高過iBond。不過銀債就唔可以喺二手市場買賣。

兔兔：如果我想再穩陣啲，你又有咩投資建議？

熊大：做定期喇，保本兼賺息。不過銀行的高息定期計劃通常比較多限制，例如需要係新資金、新客戶，又或係存款期唔可以多過3個月或6個月等。截至2月27日，最吸引的銀行定期存款計劃有招商永隆，*1萬蚊擺1年有2.35厘利息，不過限客戶用手機應用程式申請；信銀國際都吸引，*1萬蚊擺3個月有3.8厘利息，不過就限全新客戶同指定戶口。（*最終條款以銀行公布為準）

兔兔：不過今日唔知聽日事，可能筆錢到手的時候，我又想進取啲。如果進取得嚟又想偏向穩陣的話，你有咩建議？

熊大：投資黃金喇。環球避險情緒升溫，黃金成為主要的避險工具，推升金價近日創下7年高位。疫情問題一日未正式緩解，唔排除金價愈升愈有。

兔兔：咁投資黃金除了買金飾，仲有咩方法？

熊大：市面上投資黃金的工具有很多，例如實金、紙黃金、黃金ETF、黃金股，又或是黃金掛鉤存款等等。

兔兔：如果身為年輕人，冇咩經濟負擔，想再進取啲的話，1萬蚊可以有咩投資建議？

熊大：如果係「博一博單車變摩托」的心態，可以考慮買虛擬貨幣，入場門檻低至幾百蚊不等。不過要留意，虛擬貨幣的價格就好似坐過山車咁，急升時亦可急跌。例如Bitcoin 2018年最高峰可以升至近2萬蚊美元，轉眼間，2019年年初就跌到得返近3,200美元，近月又升到去過萬美元水平。

兔兔：嘩，虛擬貨幣個價咁「Chok」，心血少啲都唔掂。

聽完熊大的投資建議後，兔兔師奶仔性格上身，最後決定做定期存款，感覺好似最實際同穩陣。