【鐵探】 御用惡人林敬剛 感激老婆不離不棄

電視劇《鐵探》不經不覺間已經去到尾聲，劇中有演技出眾嘅藝人坐鎮，包括有三屆金像影后惠英紅、金像獎「最佳男配角」姜皓文等，不過「牡丹雖好，終須綠葉扶持」，戲中飾演營長（吳廷燁飾）嘅手下「阿喱」嘅林敬剛，喺《鐵探》入面追殺小朋友、以及要自割耳仔一幕都睇到人非常緊張！林敬剛入行25年，但星途暗淡，多年都只做閒角。雖然都曾經因自卑而流淚，但幸好有太太陪伴，更支持佢追夢，令林敬剛冇放棄自己嘅夢想。

撰文：Kammy｜圖片來源：林敬剛Weibo，節目截圖

電視劇御用惡人林敬剛

「林敬剛」呢個名相信大家都好陌生，聽完名都冇印象係邊個嚟，但如果講喺《鐵探》中演營長手下「阿喱」，有追電視嘅人就一定知係邊個！現年49歲嘅林敬剛，當年被李修賢睇中拍電影，繼而於1994年正式入行。林敬剛曾經係電視台「親生仔」（經理人合約），不過發揮機會唔多，當年更一度要還騷而唔開心到失眠。

林敬剛曾經講過羨慕其他同事有發揮機會，仲有諗過如果係自己做一定會做得好好，可惜佢多年來都只做閒角，唔係演老實人就係專演壞人。不過，林敬剛演戲團火一直都冇熄過，就算戲份唔多都會設計角色造型，同設計對白語氣，即使未必有人留意到，但對佢嚟講都要做好自己本份，十分敬業！

《鐵探》演黑幫追殺小朋友

今次林敬剛喺《鐵探》中做越南黑幫，一擺起個樣就已經入型入格！戲中因姜皓文養女黃學盈有佢同楊潮凱軍火交易嘅證據，佢就不斷出手想殺死黃學盈，每次出場都流露兇狠眼神。

其中一幕，講到林敬剛喺後巷度埋伏黃學盈，雖然只係同個小朋友喺度打交，但劇情都十分緊張！即使黃學盈用刀插林敬剛嘅腳，意圖逃走，但最終都被林敬剛制服。

仲有一幕係值得一提，就係其後林敬剛被發現唔聽命令，吳廷燁因為咁而要求佢自割一隻耳仔，雖然最尾都畀姜皓文阻止，但唔少人都因為呢場戲而讚佢演技出眾！事關林敬剛當時攞住把刀冇出聲，但就將刀慢慢移向自己耳仔方向，單靠其表情同眼神配合，唔講唔知以為真係會割落去！

林敬剛被何佩珉殺死個集，雖然唔少觀眾都睇到大快人心，但其實林敬剛喺個場戲花咗唔少功夫，就算死都用最後一口氣去問個究竟，佢個「死唔眼閉」嘅樣做得十分逼真！

曾一度迷失 感激老婆不離不棄

林敬剛至今已經入行25年，入行前係個警察，但最終就因為自己個演藝夢，毅然放棄呢個鐵飯碗。林敬剛多年嚟一直都等待每一個機會，對佢嚟講只要有一場戲就會捉緊嚟演。

雖然林敬剛一直都好敬業樂業，但都有試過迷失，覺得自己好冇用、自卑，更因為咁而流下男兒淚，但好彩一直以嚟老婆都對佢不離不棄。林敬剛同老婆已經結婚14年，但太太一直都冇埋怨過佢做咩角色，唔介意佢去追夢：「而家唔開心會同老婆講，佢係我唯一傾訴對象。」