一場世紀疫情，令到全球秩序大亂，首當其衝就係娛樂表演事業，幾乎全告停頓。藝人明星難得放個長假，有得重拾久違了的家庭樂固然係意外收穫，不過有得揀，梗係希望盡快有工開有錢搵。早排內地疫情開始受控，影視拍攝和節目製作亦都逐漸恢復正常，唔少香港明星陸陸續續北上復工。來回前後要隔離二十八日，一出發有排都返唔到香港，雖然唔方便，不過人仔可以排除萬難！
撰文、圖片：東方新地
佘詩曼疫情期間劇接劇未停過
去年底完成拍攝嘅內地劇《鬢邊不是海棠紅》今年三月全國首播，而呢邊廂播緊《鬢》劇，人已經去咗內蒙拍攝另一套《燕雲台》，佘詩曼唔係極速復工，而係就算疫情期間都劇接劇未停過。
胡杏兒同老公協議一人湊一個
同期花旦同期北上除咗佘詩曼仲有胡杏兒，今年九月要北上參與真人騷《 演員請就位2 》，杏兒同老公李乘德協議一人湊一個，自己就帶咗歲半細仔 Ryan 陪開工，一家四口連中秋都要分開兩地過呀陰功。
林峯太太臨盆在即時照接劇
太太張馨月之前陀緊B臨盆在即時，林峯已經北上復工同其他演員一齊出席新劇 《星辰大海》 開 機儀式。其實除咗呢套，早於五月林峯已經埋班拍緊王晶製作嘅新版 《倚天屠龍記》 電影。
黃浩然《倚天屠龍記》青翼蝠王
王晶製作、林峯飾演張無忌嘅新版 《倚天屠龍記》 電影今年五月在內地恢復拍攝，大部分幕前都係香港演員班底，其中一個就係飾演青翼蝠王嘅黃浩然，亦早已北上完成工作已回港。
劉心悠照舊一年一戲一劇
產量唔算高、一年一戲一劇嘅劉心悠都因為內地疫情受控，中秋前已經飛咗上內地開拍新劇《生活家》，仲送咗代言月餅請晒全劇組仝人食當係見面禮。
張智霖袁詠儀為賺人仔錯過魔童生日
袁詠儀今年四月已經北上補拍電影，相對放足十個月假，10月至北上接受隔離再開工拍新戲《掃黑行動》嘅老公Chilam，已經遲開工得多。搵食至上，兩公婆夫妻檔會合出席埋雙十一之夜獻唱，連11月12日寶貝仔魔童嘅14歲生日都錯過埋。
蔡少芬張晉囝囝滿半歲即極速北上
去年11月至生完第三胎，囝囝剛滿半歲，內地疫情亦剛好放緩，蔡少芬已經極速北上參與新一季節目《妻子的浪漫旅行》錄影，冇耐，連老公張晉都北上會合拍埋一份。
高海寧打入內地市場捉緊機會
雖然客串短短幾幕，不過現身劇集係紅遍全國嘅《 三十而已 》，角色仲要舉足輕重，執到支好籌嘅高 Ling 亦因此成功打入內地市場，拍完新劇《 七公主 》後都即刻飛咗去北京開工，剛完成隔離投入拍攝中。
陳小春應采兒為賺人仔直播生仔
基本上成個疫情期間，陳小春應采兒同囝囝一家三口，甚至連應采兒父母，都冇放棄過賺人仔。陀住二胎全程直播到入產房，都有湖南衛視拍攝隊全程跟拍《新生日記2 》，其後一家六口北上繼續拍攝，陳小春則邊拍真人騷同時接下不少演唱騷。
林曉峰謝天華拍新戲《風速極戰》
今年九月驚爆同結婚十八年嘅老婆康子妮離婚消息，疑似大受打擊剷晒前妻相嘅林曉峰，好彩有戲開可以寄情工作，同月底就出發珠海開始十四日隔離，然後同謝天華、元秋、元華一齊拍新戲《風速極戰》
李國麟大讚內地防疫工作做得好
除咗小生花旦，其實甘草演員都好受內地觀眾同劇組歡迎，今年八月李國麟算係最早一批北上復工嘅香港演員，隔離完仲大表感慨，大讚內地防疫工作做得好。