時近年尾假期，不少學校都會舉行歌唱比賽等聖誕活動，不過這間「聖公會李福慶中學」舉行的全校歌唱大賽就勁到請來張敬軒當嘉賓！早前有網民在社文平台分享相片，留言「學校sing con請軒公 打敗全港學生99.9999999%」，更引來張敬軒本尊留言。
張敬軒搞笑留言：「其實我係去參賽。」而在其個人IG，亦以歌曲〈青春告別式〉為背景音樂剪輯出影片，亦寫下長文感謝歌迷多年支持：「搵返呢一首歌嘅demo出嚟, 叫威廉幫我剪咗呢段片……近幾年一到年底, 隨住頒獎禮氣氛變得熾熱, 好多朋友都會去到街上幫我拉票, 希望我可以喺頒獎禮上台, 獲得好成績。其實如果唔係特登擰返轉個頭去睇, 我都醒唔起自己經歷咗三四代樂壇嘅變更。近四、五年以嚟, 歌迷同歌手之間嘅關係同以前相比真係唔同咗好多, 我自己都喺各種嘅新現象中慢慢觀察, 慢慢摸索出一個唔令大家失望, 又唔離自己嘅意願同初衷太遠嘅方法🤗」
當中提到歌迷為他拉票：「寒風嗖嗖嘅11、12月, 大家為咗我喺街頭為我同我嘅歌曲拉票, 當中嘅種種情義令我同我團隊當中嘅每一個人都十分之感動, 因為呢一份愛盛載住好多嘅守護同埋陪伴。我亦都常常感恩自己擁有眼前嘅一切, 呢一種同行嘅感覺越係喺呢個行業越耐, 就會覺得越珍惜。知道有為我喺街上、喺自己嘅朋友圈子入面拉票嘅朋友係今日中午知道<青春告別式>未能入圍五強而感到失落, 當中嘅各種心情我都十分明白, 但畢竟入行多年, 深知道一首作品的成功與否不能只靠獎項入圍或者獲獎與否去作為創作音樂嘅動力同衡量標準, 反而倒係擔心自己點樣可以安頓好大家內心遺憾嘅情緒。」
最後感謝歌迷多年支持，決定剪片說一聲多謝：「於是, 我摷返一年幾前send畀公司同事嘅<青春告別式>原裝demo, 加上我呢大半年嚟當我喺唔同嘅地方所感受到、經歷到嘅愛同埋畫面, 拜託威廉幫我剪咗呢一段短片, 希望喺帶嚟安慰情緒嘅能量之餘亦都可以好好咁樣同大家講一聲多謝！目前所行到嘅每一步, 我已經好感恩好感恩了, 衷心多謝大家☺️❤️ 辛苦曬大家了！今日晏少少我會喺機場報佳音, 得閒嘅就入嚟聽我唱下聖誕歌啦😘 祝各位冬至快樂🫂🫶🏼」