我們看待跑步這件事情….
我呢啲點睇都係實力派嘅跑手，即使鏡頭前都從不介意面容扭曲口水鼻涕直流，跑到就得啦，你理得我。直至遇上 Winter 教練才明白表情管理原來都係一門學問且有實際需要。
成立超過 10 年嘅 Asics Running Club，由徐弘泰教練 (Winter)及一眾 Team Asics 大師兄師姐所帶領。自恃走訪過各大跑會，A組常餐食唔少嘅我，沒料到會碰上如此一絲不苟嘅教練，自學跑以嚟首次被狠批沒做好表情管理!
拍攝當晚如常跟A組同學互片幾set，自以為表現不錯之際，被嚴如訓導主任嘅 Winter 教練拉埋一邊狠狠提點 :「跑完返嚟必需盡快回氣，切忌垂頭喪氣死狗咁嘅樣，執返正啲眼耳口鼻，整理好表情，做啲有用嘅嘢，為下一set做好準備。」當頭棒喝，絕對係由外到內再到返外嘅完美定義，如此細微之處都嚴謹至此，呢堂有錢落袋，賺咗 !
對唔少人嚟講，跑個步啫，到底需要有多認真?
誠然，屋企樓下公園跑幾k又或運動場衝10隻800都叫做跑步，悉隨尊便豐儉由人，如何對待跑步就形同如何對待人生一樣，各自嘅人生由不同經歷所建構而成。Winter 教練曾經歷過一段失落嘅日子，迷失於人生目標與方向，宅於家中一段頗長時間。慶幸從未放棄初心，痛定思痛透過跑步慢慢重拾自我。擔任過港隊代表，其後更跑而優則教成為專業教練。這無疑就是一次訓練甚至一場比賽嘅縮影，從徬徨、混沌、迷茫、重整當中成就每一次嘅得與失，對佢黎講，跑步絕對係生命嘅一部份，認真對待是理所當然。
仍記得自己剛開始跑步之時，馬馬虎虎得過且過，花六七成力，追唔到就算，是但啦，跑步啫!
但人大了hea夠了，繼續躺平只會由廢青變廢中，破斧沉舟又睇吓行到幾遠跑到幾快，故開始嘗試比較刻苦嘅訓練，逐漸發現每一次嘅爆汗與爆肺皆令自己堅實地感到生命嘅熾熱，亦領悟到只有堅持頂L住才能於人生路上昂首闊步。還未開始跑步嘅朋友往往難以了解跑者們何以執著於種種細節，甚麼呼吸提腿摺腿送髖擺手挺胸前掌落地….煩死，連表情管理都要兼顧?
但人生不就是由無數煩死人嘅細節所組成嗎 ? 不就是由一場又一場嘅試練所構成嗎? 結果係點完全唔重要，當你回想自己如何從刻苦訓練中捱過來，每場試練全力出擊，至少可以無悔拋鑊自己，跑步好做人好，夠有凸!
The post 尋找跑會的故事 #11 | ASICS Running club appeared first on Fitz 運動平台.