巴黎奧運｜謝影雪告別奧運IG發文一字一淚：我以後會好好照顧自己身體

【體路專訊】香港羽毛球首席混雙「鄧謝配」鄧俊文／謝影雪於巴黎奧運以8強作結，飽受傷患困擾的謝影雪今日（2日）於社交平台透露奧運備戰期間面對傷患與壓力的心路歷程，經歷多次忍著痛楚含淚訓練的日子，奧運前備受傷病夾擊仍打出滿意表現，今日終於可以放鬆三年來緊繃的心情。不少網民留言期望她保重身體，阿雪亦似有回應：「我都要好多謝我嘅身體，多謝你18年來比我用到五勞七傷，抱歉無將你哋照顧好，我以後會更愛錫自己了。」

謝影雪今日於社交網站分享內心感受，向自己及身邊團隊表達感謝：「我嘅巴黎奧運完成喇！終於等到完嘅一刻，呢兩日心入面都有好多感受，但完成呢一刻，我好想將第一個分享留比我自己，因為我想先多謝我自己。

可能我平時都不時會多謝身邊嘅團隊，但原來成日漏了多謝自己。今次好感恩第四次企上奧運舞台，由爭取奧運積分到真係完成嘅過程，已經唔識可以點形容。以前後生打波，咩傷都無嘅時候，覺得所有事都好易，條路好簡單、好易行；之後到今次奧運爭分前，我同俊文嘅狀態已經差到好似唔識打波一樣，當時幾乎無信心可以去到奧運，之後爭分初段雖然成績一直低沉，但後半年好彩突然回復狀態，更加可以打到年終賽。」

“有時會唔明白，點解好似好多事去阻止我去巴黎一樣。”

其後，她又分享奧運前備受傷患困擾的歷程，尤其是確診類風濕關節炎的種種苦況，甚至令她在訓練期間忍不住痛哭：「不過，我永遠都估計唔到傷患幾時會嚟搵我。今年1月開季時喺印度拉親之後，好返之後就想打支骨針令膝頭無咁痛，但打完之後突然出現藥物敏感，有日瞓醒兩個膝頭腫痛到瞓覺時無法轉身，好似連去洗手間都要扶住，令好簡單嘅日常事都無法做到。年初二當日行去醫院搵容醫生條路時好似行咗好耐好耐，最後要坐上輪椅，兩日喺兩個膝頭抽出幾樽水。好返之後以為應該可以好順利行落去，但到6月有一日起身，梳頭時發現兩個手肘痛到舉唔高，初時以為自己受傷，但第2日出發亞洲三站賽事，所以只可以食住止痛藥出發。一直在三站期間，上網不停搵相關資料，因為每次過幾天，就會有多一個關節出現腫痛，到最後番到香港時，手指痛到握唔到球拍，練波都練唔到，好幾次練到一半瞓喺球場度忍唔住喊，做GYM時因為伸唔直雙手，所以要調較到唔痛嘅角度去做，然後一邊做一邊喊。

最後經過8次MRI，同埋無數次超聲波及抽血，確診類風濕關節炎。雖然因為上網搵資料時自己有一刻諗過，但確診一刻雖未有晴天霹靂，但心入面都沉咗一下，但當時因為距離奧運只有唔夠一個月，我只係好想快啲有藥食，快啲將痛㩒住，可以令我正常練波。食藥後終於將痛減少，可以練波時真係覺得好開心，但之後好似壞嘅事會接二連三出現，一日後膊頭第8次甩骹，嗰一刻好崩潰，好好彩容醫生雖然忙梗都即刻飛車去醫院。好記得麻醉藥後，我問容醫生我仲去唔去到奧運，之後佢好有信心同我講無問題！令我本身由好崩潰變得安心落嚟。然後再超MRI，好彩情況唔算好差，第2日已經可以帶住手托去做物理治療、恢復及力量。記得隔2日授旗禮我都唔敢去，唔想人人準備十足迎接奧運時，我就托住手去影響大家士氣。仍然覺得好好彩，幾日後已經開始落球場，做簡單訓練，但心入面其實仲好驚同好有陰影，以前甩骹會休息2星期先練，練到好有信心先落場，今次只係2日已經落場，可能係奧運令我勇氣大咗，每日都鼓起勇氣去試唔同動作，因為望住俊文自己練，我都好想快啲跟上佢嘅進度。身邊有人笑話：呢啲故事令你運動生涯更精彩，但我真係唔需要好精彩，因為咁多年咁多高高低低，我只係想今次奧運打出自己最好嘅狀態，有時會唔明白，點解好似好多事去阻止我去巴黎一樣。」

“我心入面好矛盾，等左好耐最後一屆奧運，一方面我好想去享受，一方面又好想奧運快啲完”

謝影雪在文中又提及內心對巴黎奧運的矛盾心理，亦感嘆奧運完結後，未來會更愛錫自己：「對於今次巴黎奧運，我心入面好矛盾，等左好耐最後一屆奧運，一方面我好想去享受，一方面又好想奧運快啲完，因為好期待整個人可以放鬆落黎嘅一刻。呢三年我覺得整個人已經谷到我自己嘅極限，但呢一刻我係好開心我可以做到自己目標，可能大家都講想我哋拎牌時，我自己就好想去享受呢個舞台，今次我覺得自己真係做到喇！比起上一次，我更發揮到自己嘅能力，可以打番出一個似謝影雪嘅比賽比大家睇，雖然今屆成績無上屆咁好，但對於發揮，我係今屆比較滿意。

最後，好多謝我自己堅持咗咁耐，我覺得呢啲事比以前既謝影雪遇到，可能已經一早放棄咗，但經過今次，我覺得我真正學識咗及做到自己嘅座右銘。我都要好多謝我嘅身體，多謝你18年來比我用到五勞七傷，抱歉無將你哋照顧好，我以後會更愛錫自己了。」

圖：麥景智
文：賈兆志

《體路Sportsroad》
屬於香港人的體育新聞平台
Facebook: https://www.facebook.com/Sportsroad/
Instagram: https://www.instagram.com/sportsroad.hk/