《IAN CHAN ”TEARS“ IN MY SIGHT SOLO CONCERT 2024》
等到頸都長，Ian第一個個人演唱會終於舉行！一如所料地出色動人，唱出各種情感，為樂迷帶嚟滿足充實嘅視聽享受。
(我睇19/7頭場)
「兩旁似要凝結而途人漸遠 四目對碰避進避世的樂園 曈孔之間交錯的一秒 化作了開端」
開場Ian先以鋼琴獨奏，引導大家進入情緒，再緊接自彈自唱，開始一章愛情故事，由一見鐘情，渴望拉近彼此距離，慢慢發現現實同幻想差距太大，越走越遠，越愛越痛。及後再以深情甜蜜與悲情傷感作，讓觀眾流出不同眼淚。中段仲有兩首型格跳唱歌，令人雙目發光。最後用歌聲唱出對樂迷嘅感謝，感人地落幕。
「畫面充滿愛 但願可與你 無時差漫步 重返舊地 相隔再多不過是 幾千公里」
今次演唱會非常著重音樂性，作出眾多改編，加入各種樂器，仲有唔少歌曲喺Ian演繹後用上一段純音樂做間場，觀眾可以完全沉浸喺演奏中，使演出更豐富連貫，毫無冷場。
「落下淚捨身替你成大志 若是為你我可以」
我特別喜歡兩段悲情medley。先係同Joyce嘅合作，佢一手鋼琴為作品賦予更大力量，將歌曲情感昇華，深深打進內心，驚喜又令人震撼；另一段就係以《下次愛你》、《另一個諾貝爾》、《仍在》道出苦戀故事。即使仍然愛著對方，但關係再無法挽救，剩下無數遺憾與抱歉，一切已成為歷史，只能夠活在回憶中。配合舞台設計同舞者們富藝術性嘅演出，作品變得更有畫面，加倍揪心。
「事實是 無去路 無退路 都愛着妳 現實是 時與地 人與物 也沒運氣」
Ian live唱功穩定，比CD版再多咗份感情同感染力，越唱越有，好幾次我都聽到起曬雞皮，湧出無數情緒。雖然首次自己駕馭整個演唱會，但佢完全無恰場，圓滿地完成。比較可惜係依場無唱到《以孤獨命名》同《背伴》兩首我好喜歡嘅作品，不過無損整晚精彩。而現場氣氛亦相當熱烈，觀眾們大合唱《二期大樓》更加係錦上添花，睇得出大家等咗依個show好耐好耐。
「回頭沒法消去徬徨 我便迷信 留住得一天也耐看」
陳卓賢嘅作品係有種特別吸引力，不論甜蜜或悲情，總會勾起各種埋藏心底嘅感受，然後用溫柔歌聲療癒你心靈。佢仲一直挑戰自己，創作出唔同風格、題材嘅作品，首首高質。今次演唱會再次展示Ian嘅唱作才華同願意嘗試嘅心，非常值得欣賞，亦係樂迷福氣。
「若前路太遠 有著你 便無懼偏遠 人潮和龍捲 都捲不下 繁榮城下兩幢對聯」
從《二期大樓》、《正式開始》時期帶點青澀稚氣，到《擁抱後的歌》、《以孤獨命名》變得成熟穩重；由造星時比人感覺怕醜內向，好似成日收埋自己，到今日以作品分享種種個人情感。能夠沿路見證Ian成長係有種難以言喻嘅感動。
「棲息所處處烽煙 同在與妳冒險 社交太倦 只想妳跟我 藏身這個樹林 愛一遍」
最後，講多少少個人感受。Ian喺造星時我已經係半個歌迷，特別喜歡佢嘅聲線同埋台上台下嘅反差，第一首喜歡嘅作品係《另一個諾貝爾》。之後每次出新歌都會馬上聽，對Ian嘅喜愛不斷上升，每年總有作品打動到內心，替我分擔不同情感，百聽不厭，慢慢成為一個hellosss，仲係我寫文介紹得最多嘅歌手之一。睇完今次演唱會更加奠定陳卓賢喺我心中位置，非常榮幸能夠在場。
「在相識 頭一秒 知道自己找到了」
未來Ian尚有漫漫長路要走，相信佢會繼續用心地創作動人佳作，陪伴樂迷渡過生活每個難關。
陳卓賢，感謝你成為樂迷們的無尾熊，照亮大家心境，同在與我們冒險，Good Show！💙
片一：《Lost at first sight》
片二：《DWBF》
片三：《鯨落》
片四：《再見 寧靜海》
片五：《Sheesh》
片六：《另一個諾貝爾》
片七：《仍在》
片八：《留一天與你喘息》
片九：《正式開始》
▼Follow hkpopculturelover
Instagram: https://www.instagram.com/hkpopculturelover/
