歐霸盃十六強賽事，韋斯咸主場鬥德甲球隊弗賴堡，首回合落後一比零嘅韋斯咸，今日必定要攻入一球先有價講，因此領隊莫耶斯排出4-2-3-1陣式，以安東尼奧(Michail Antonio)做正中鋒，柏基達(Lucas Paquetá)攻擊中場、右翼查洛保雲(Jarrod Bowen)、左翼古度斯(Mohammed Kudus)，中場禾特包斯(James Ward-Prowse)先列後備。至於作客嘅弗賴堡排出4-1-4-1陣式由日本國腳堂安律(Ritsu Doan)踢右翼，沙拉爾(Roland Sallai)就打正前鋒。
韋斯咸開波8分鐘透過一次角球攻勢，左閘基士維(Aaron Cresswell)左路開出，蘇錫克(Tomas Soucek)前柱一頂二傳到尾柱，由柏基達伏兵尾處近門撞入，8分鐘就成功追平比分。
開波早段就被追平嘅弗賴堡被打亂節奏，雖然有時候做到反擊，譬如9分鐘沙拉爾起腳處邊僅僅出界，但受制於韋斯咸前場高位逼搶，弗賴堡嘅威脅有限，就算其後能夠係Final Third組織攻勢，都被韋斯咸球員解除威脅並大腳清走。
韋斯咸嘅球員今日相當有決心，部份球員狀態相當好，特別係中鋒安東尼奧，18分鐘安東尼奧接應後場傳送，自己點落嚟再沿邊路爆入去cut back回傳中路，古度斯起腳斜出，呢次進攻雖然未能轉化成入球，但已經展現到安東尼奧本身擁有嘅力量，對住對方中堅Manuel Gulde明買明賣用力量突破。除咗突破嘅力量，安東尼奧能夠協助球隊攞到第一點，再係中前場回傳，作為前場組織嘅第一步係相當重要。另外今日踢返右翼嘅查洛保雲可以面對面挑戰對方所謂，佢係32分鐘甩開對方右閘根特(Christian Günter)，撥橫射返遠柱入網，上半場總比數反超弗賴堡2比1。
事實上弗賴堡今場取態不明確，或者係8分鐘就被追平總比分打亂咗陣腳，防守唔夠穩健，一對中堅或者防中對安東尼奧所給予嘅壓力唔足夠，令對方容易攞到第一點。進攻又唔夠走動拉開空間，只能夠等待反擊機會。
下半場弗賴堡半場換入前鋒基哥列斯治(Michael Gregoritsch)，轉成4-2-4陣式，寄望協助球隊增添入球，不過下半場先入波嘅係韋斯咸，右翼查洛保雲禁區內橫傳，打算比中間嘅蘇錫克但全部漏晒，由基士維左腳禁區控好再用右腳chop入網，韋斯咸總比數領先到三比一。
拉開兩球優勢後韋斯咸伺機而動，低位防反塞滿禁區，弗賴堡本來進攻組織已經唔多走動，面對鎚仔嘅縮後防守更無計可施，結果墜入西咸嘅陷阱，77分鐘古度斯重現孫興慜金球，後場高速突破，先推過兩個，再cup過對方守衛Lukas Kübler燙近入網，一個相當精彩嘅入球，而佢係85分鐘再係禁區頂峨嵋月起腳，個人梅開二度，並且協助球隊贏到五比零，最終兩回合計韋斯咸5比1擊敗弗賴堡，晉級歐霸盃八強。
客隊上半場攻守取態唔決斷係敗筆之一，下半場轉4-2-4陣式雖然賀拿(Lucas Höler)會退係攻擊中場位置，但走動拉開空間或接應傳球實在太少。相反主隊對晉級嘅決心相當強烈，先係上半場主動壓前取得效果，前場四位進攻球員個個都有表現，安東尼奧雖然無入球或助攻，但以受傷過後同33歲嘅佢，今日衝刺力同力量突破相當有威脅，因此韋斯咸晉級實至名歸。
▼Follow 足球港場
Instagram: https://www.instagram.com/footballarena_hk/