英超星期六早場賽事，曼城主場對愛華頓，曼城今日先收起獲加、迪布尼同貝拿度施華，輪換之下雖然主導形勢，但被愛華頓係上半場保住0比0，下半場迪布尼同卡爾獲加落場後威脅逐漸增大，71分鐘曼城一次角球攻勢，夏蘭特禁區半車身抽射入網1比0。85分鐘曼城快速反擊，迪布尼弧線形地波向前傳，夏蘭特單刀爆過愛華頓中堅巴夫韋治，將比數改寫成2比0，最終夏蘭特梅開二度，2比0擊敗愛華頓，暫時重返聯賽榜首位置。
除左IG，最近建立Youtube頻道《足球港場 - Chung》
每個星期都會同大家傾下波經，希望大家多多支持🙌🏻
#英超 #曼城 #愛華頓 #夏蘭特 #迪布尼 #科頓 #卡爾獲加
英超星期六早場賽事，曼城主場對愛華頓，曼城今日4-1-4-1陣式主要有4個變動，包括正選用上史東斯(John Stones)踢右閘、艾簡治(Manuel Akanji)踢中堅、馬菲斯紐尼斯(Matheus Nunes)踢攻中同杜古(Jérémy Doku)踢左翼，迪布尼、獲加、貝拿度施華同加華度先列後備。作客嘅愛華頓陣容上人員同上一場賽和熱刺一模一樣，同樣係4-2-3-1陣式以卡華利雲做單箭頭。
曼城進攻呈3-2-4-1陣式，艾簡治會上一格同洛迪形成雙防中，進攻手段主要比左邊杜古作突破，或者係右邊搓入禁區搵夏蘭特，而曼城有返夏蘭特就做到係禁區停波嘅支點。
另一邊愛華頓防守主要呈4-4-2陣式，其中卡華利雲同積夏里遜(Jack Harrison)會形成第一度防線封住中路，而積夏里遜更積極緊貼洛迪以干擾佢嘅傳球路線。曼城上半場除左第一個推進點被影響外，左路嘅進攻更被針對，因為今日38歲嘅老將楊格(Ashley Young)防守相當盡力，半場就會盯防對手嘅杜古，如果杜古落到三閘線，更會聯同右閘賓葛菲兩個夾一個，所以愛華頓已盡力降低杜古嘅威脅，繼而令曼城即使係上半場有10次起腳，但無一次係射中目標，愛華頓半場成功守住0比0。
下半場初段攻守格局依舊，直到57分鐘迪布尼同卡爾獲加落場，轉陣4-1-4-1陣式，增加多一名進攻球員，並且利用邊路嘅空位推進，再交出更直接更快速嘅橫傳傳中，結果71分鐘曼城憑著一次角球攻勢，迪亞斯第一點頭鎚被擋，愛華頓中堅巴夫韋治解圍但落係附近嘅夏蘭特，夏蘭特半車身抽射入網，門將碧福特即使撲到仍然入網，曼城成功領先1比0。85分鐘曼城快速反擊，迪布尼弧線形地波向前傳，夏蘭特單刀爆過愛華頓中堅巴夫韋治，將比數改寫成2比0，並最終以此賽果作結，暫時重返聯賽榜首位置。
曼城方面上半場收起部分主將，或許係為週中歐聯十六強作準備，但位置上代替迪布尼嘅馬菲斯紐尼斯表現較為暗淡，連帶令夏蘭特係上半場較少供應。下半場哥帥嘅變陣成效立竿見影，更快速直接嘅傳中令愛華頓縮得更後，加上迪布尼同夏蘭特嘅連線，17次射門兩次中目標兩個入球，拿下勝仗無難度。
愛華頓方面上半場嘅部署係成功，特別係積夏里遜貼身防守洛迪，楊格回防同聯防都相當賣力，防中占士加拿亦經常走去Half space補住漏洞，只係可惜70分鐘失守。愛華頓防守其實都算做得唔錯，但隨着時間過去集中力同體力逐漸下降，尾段要壓前追平已經無力，加上可用人選同質素有限，落敗亦無可奈何，只係可以思考有冇機會增加更多死球機會利用自己嘅優勢，今場愛華頓1次角球都無，進攻上5次起腳只有1次中目標，如果戰術上獲得更多死球機會或者有不一樣嘅說法。
▼Follow 足球港場
Instagram: https://www.instagram.com/footballarena_hk/