新一年，舊願望
就嚟到2020年喇！新嘅一年有新嘅希望，都係時候update吓自己嘅新年願望list喇！大家仲記唔記得自己喺2019年年頭定落嚟嘅願望有啲乜呢？依家年尾又有冇完成到啊？真係唔係講笑，唔少人訂個目標真係十年都未做到。喂！人生有幾多個十年啊？仲拖？好喺2020年完成佢啦！今日就等dailyview同大家講吓十大香港網民喺2019年定過嘅新年願望，再睇睇網民點評價自己今年嘅表現啦！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 識多啲朋友（175筆）
人愈嚟愈大，識朋友嘅機會就愈嚟愈少，好多人都希望新一年可以認識到新朋友，其實認識新朋友都有好多種方法，參加活動、玩交友APP、健身運動都係認識新朋友嘅途徑。而今年好多網民都話，因為社會時勢嘅關係，認識咗好多同路人啊！喺「兄弟爬山」既道路上，好多香港人都connect晒！識朋友？無問題！
網民金句：
「今年重新認識咗香港人」
「成街都係巴絲啦」
「今年係我識得最多新朋友嘅一年」
image source:LIHKG／用戶「觀賞用」
9 戒酒（179筆）
收工之後蒲一蒲飲返杯酒係好多人嘅例行活動，有網民話生活日日都keep住down，心情唔好就想去飲兩杯解悶，好想戒酒終結呢個惡性循環，但係香港地生活壓力咁大，想有活動解下悶，真係好難成功戒到酒。相反，今年有啲網民就話真係飲少咗！「今年日日都行街，邊有時間去蒲」，其實參與一個有意義嘅活動從而順便戒酒，真係一舉兩得㗎！
網民金句：
「戒酒易過戒煙」
「今年日日都行街邊有時候去蒲」
「依排日日咁down 一收工就去飲兩杯」
image source:flickr／atsix
8 出pool（181筆）
鄰近年尾，新年、聖誕各個中西節日排住隊嚟，喺街見到個個都成雙成對，就好似提醒緊你，你又孤獨咗一年。唔少網民今年年頭誓要出pool，但結果就好灰，話真係搞唔掂。女神唔理人，男神已經心有所屬，唔敢繼續努力？喂！自己唔努力爭取，唔通等個天跌個女朋友、男朋友畀你咩。鼓起勇氣啦！香港人想要嘅嘢實會出盡力爭取㗎，出Pool話咁易啦！
網民金句：
「這些機會……」
「其實毒 x 一個更開心」
「不要說了！」
image source:取自香港網絡大典
7 睇多啲書（201筆）
睇書真係好緊要，除咗可以扮吓文青，更重要就係可以增進知識啊嘛！所以唔少人都會喺年頭訂個閱讀目標畀自己，set定自己今年要睇好幾本書咁。但係唔少網民就表示，好多時立下決心，書都買埋，但一打開本書就眼瞓，去到年尾一本都未睇晒。唉，又係嘅，個個想睇書，唔通個個都睇到書咩？
網民金句：
「我今年睇咗Facebook」
「我睇咗死亡筆記」
「漫畫書計唔計？閒閒地幾十本喎」
image source:flickr／Eugene Kim
6 學多個語言（261筆）
香港人由細開始學英文，學語言已經係習以為常，新一年希望自己學多個語言識多樣野，係好多人嘅願望。希望學完一門外語可以有多個出路，「學外語賺大錢」、「學完西班牙文去歐遊」。但係就有網民訴苦，以前細細個學英文嘅經驗實在太痛苦，學多門語言簡直係自己攞苦嚟辛，所以用晒成年時間都未有勇氣正式開始。
網民金句：
「想學日文 以後可以睇片唔洗字幕」
「香港人英文都未講好就唔好攪咁多嘢啦」
「唉 背完音標已經唔想再學」
image source:pixabay／905513
5 畀自己去旅行（319筆）
香港人生活壓力大，去旅行變咗每年必備行程，希望暫時離開現實抖一抖，去唔同國家感受吓唔同嘅生活模式。有人年頭就已經計劃好晒要點樣拎假、新一年去邊啲地方抖下氣。有網民分享，去旅行呢件事簡直係一年當中嘅理想No. 1，努力工作就係為咗實現呢個小小願望，係支撐一年辛苦工作嘅一大原因。
網民金句：
「休息是為了走更長的路」
「#即興 #說走就走的旅行」
「今年去咗次日本 買唔到樓喇」
image source:pixabay／DariuszSankowski
4 搵新工（341筆）
年頭係好多人轉工嘅時間，因為年尾花紅拎晒，係時候迎向新嘅未來。但就有網民話，工唔係咁易搵，分分鐘年頭搵到年尾都未搵到適合嘅工作，可能人工太低，離屋企太遠，又或者工作量太大要成日OT，呢個新年願望要實行真係唔容易。另外有網民就話見到今年好多香港人都轉咗工，想同咁多位講聲「香港人，加油」！
網民金句：
「唔轉工？跌咗良心？」
「岩岩裸辭了」
「唔係鬼上身，點講得出……」
image source:pxhere／mohamed hassan
3 儲錢（414筆）
正所謂錢唔係萬能，但係無錢就萬萬不能。新一年無論有咩計劃，唔多唔少都需要金錢支援，旅行、買車買樓、買電話都要錢，所以好多人嘅年度目標都係儲夠一筆錢，好好咁運用佢嚟到達成其他目標。有網民話，錢可以解決到好多問題，有錢嘅話，生活就可以過得順遂啲，所以咩目標都好，首先都要儲咗錢先。
網民金句：
「今年捐晒 無悔」
「儲完買到樓咩？」
「我儲咗八千 問爸爸拎咗2百萬」
image source:pxhere
2 上車（897筆）
香港樓價係世界上數一數二貴，租屋又貴，上車又難。令到好多香港人每一年都要將「上車」列入終極年度目標入面，用一年時間奮鬥，博下來年成功上車，成為有樓一族。網民對於呢件事就抱怨不斷，樓價不斷被炒高，人工又同樓價差距甚大，再計埋通貨膨脹，點追啊？買樓咁重要嘅目標梗係要年年堅持不懈，擺入願望清單！
網民金句：
「想抽公屋多d」
「居屋都買唔起啦唉」
「我都想住私樓食雞脾啊」
image source:wiki／ZIouhoaja
1 減肥（930筆）
每年開始嘅其中一個大計非減肥莫屬，年頭農曆新年期間一個個飯局係咁嚟，辛苦完一年當然要食返餐勁獎勵吓自己，但係一唔小心就會食太多，咁就要開始解決上一年同新年積落黎嘅脂肪！有網民喺年頭立下誓言，要趁夏天之前減磅成功，迎接陽光與海灘；但另一邊就有人話，香港呢個美食天堂，要戒口真係難過登天！
網民金句：
「我今年又肥得靚啊喂！」
「今年減唔到？唔驚啦！下年減過」
「我定減肥目標 定左都成十年喇」
image source:pixabay／mohamed_hassan
【以上圖文為香港網路溫度計調查結果，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2018年12月24日至2019年12月23日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『熱門新年願望』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。