1：最近同先生行經銅鑼灣，經過渣甸街京華中心，即係港鐵F出口對面嗰幢時廢噏：
👩🏻🦰：嘩，呢個位咁旺，吉咗咁耐都仲係租唔出。
🧑🏻：之前好似係維多利亞的秘密，做唔住啦。
👩🏻🦰：我記得細個喺呢度間Giordano買過把遮，勁好用，好硬淨，唔見咗之後買唔返同一把呀，so sad……
🧑🏻：呢度邊有Giordano呀？明明係屈臣氏。
2：由於佢唔信，為咗啖氣，我搵返晒資料。Giordano早喺90年代尾已經租咗京華中心地舖，到2001年就更加擴充呢個舖位，仲做埋旗艦店，證明我冇記錯！不過，咁先生都係冇錯嘅，當時除咗Giordano，的確係仲有屈臣氏。
一路到2011年，呢個黃金地段舖位，先俾Forever 21以1,100萬元承租作為旗艦店，之後租金更加升至1,380萬元，創香港最貴月租舖位紀錄。
至2017年約滿，就由Victoria's Secret接手，不過到2020年三年都冇，就止蝕執咗間舖，舖位就一直丟空到今日。至最近有新聞話，京華中心業主終於面對現實，拆開舖位租，地庫亦已租俾Market Place，租金亦當然實在啲，係60萬。
3：京華中心嘅過往20幾年，可以話係見盡香港，以至世界時裝業嘅興衰。90年代，香港製衣業仍然係享譽世界，喺仲未有fast fashion嘅年代，除咗Giordano，仲有Bossini、U2、G2000呢類香港連鎖品牌，就成為港人買衫熱點。之後Forever 21以天價租舖嘅年代，正正就係香港自由行、零售業最旺，銅鑼灣彷彿不屬於香港人嘅年代；不過由於公司擴張過度，成個集團到2019年走上破產之路，forever 21 can't last forever。
同時，佢嘅執笠亦代表fast fashion唯快不破呢招開始失靈，fast fashion增長開始getting slow。到後來，維多利亞的秘密極速撤出舖位之後丟空兩年，完美反映行業本來都唔易過，加埋疫情，自由行拜拜，零售時裝咁就GG。結果依家呢個舖位， 兜兜轉轉，都係返去民生舖懷抱，做超市。係一個時代的終結，亦係另一個時代的開端。
4：頭先講到Giordano（709），早前主要股東周大福控股提出全面收購，每股1.88元，目標係要揸到50％嘅股份。股東接受offer首個deadline星期一已到，但50％門檻未到數，仲差5.02％嘅股份先夠數，依家周大福就決定，延長截止日期至13號。
呢單刁其實幾有趣，周大福提全購，兩執董講明唔會沽，主席兼CEO劉國權就解釋話自己冇套現需要，唔沽之餘，公司仲決定增派中期息到8.5仙，留「客」味濃。即是話，投資者想勸人賣股俾佢，CEO唔單止冇坐埋一隻船，帶頭唔賣仲要話「我唔等錢使」，然後仲「息誘」股東：有錢齊齊分，大家唔使走！wow！大股東同管理層兩邊，駁火味濃。
5：仲要中途殺出個程咬金David Webb，話香港零售復蘇緊，依家作價太低。當然，有散戶亦會諗，如果我接受offer，1.88元俾咗周大福，「咁我咪蝕咗個息？我都係唔沽啦」係收少咗息，但呢個考慮嘅前提係，股價頂得住？
周大福6月底提全購，當日好多人狗衝入去，股價最高升22％到1.95元，之後股價就只係喺1.85元上落，到1.88就行人止步。假設大家都唔放手，周大福全購失敗，後果係點先？相信就就係股價好難繼續維持喺呢個水平，甚至係打回原形去返1.5至1.6元水平。
唔係冇例子架，類似嘅係華置（127）之前私有化失敗後，第二日股價暴跌22％，之後股價逐步回落，已去返私有化前嘅水平，亦比作價低超過四成。
好啦，近幾個月買入諗住短炒嘅人，叻極你咪最平都係喺1.7元呢個位買入，到底可以承受到佢跌幾多先？依家唔接受offer，連最後逃生門都冇埋，到時人踩人沽落嚟， 就蘇州過後冇艇搭。當然，如果你覺得就算全球通脹情況下，龍頭如H&M、Zara、Uniqlo都要加價應付成本上升，服裝行業前景依然一片光明，越做越有的話，咁就冇得好講了。
6：最後想講，近呢幾年疫情之下，銅鑼灣冇咗自由行，少咗藥房、找換店；但多返好多民生舖，本地小店租得起地舖，最少行過都見到幾間賣衫小店，條街感覺好行咗，有人味咗。同埋，至少，唔使俾啲拖篋輾過隻腳。世事，有得必有失。
密切留意BossMind動向！立即CLS