夾糖｜邊款夾糖最受歡迎？酸沙可樂糖都只排第2位、網民票選10大最愛夾糖排名！

夾糖｜零食對唔少朋友嚟講，絕對係童年時成長重要的一部份，當中「夾糖」更係大家嘅童年回憶。見到一大堆五顏六色嘅糖，一格格咁放好、想食邊款就夾邊款，唔少人到現時都對「夾糖」情有獨鍾！到底家下邊到有得「夾糖」？大家最鍾意嘅又係邊幾隻夾糖？即刻睇下網民票選10大最愛夾糖排行榜！

撰文：海月 ｜圖片：LIHKG、Sweetcandy、Bonbonbonsss｜編輯：odin

夾糖｜邊款夾糖最受歡迎？

網民票選10大最愛夾糖排名

以重量計錢嘅夾糖，因為「平、靚、正」而成為唔少人成長嘅童年回憶， 夾糖顏色、款式同口味都非常多樣化，如荷包蛋糖、可樂糖、香蕉糖、熊仔糖等，造型同味道都非常易入腦，愈食愈上癮。到底一眾網民最愛食又係邊一款？

第10位 士多啤梨扁鞋帶

帶有士多啤梨味嘅酸甜，加上煙韌口感，成為唔少男女網民熱門選擇之一。

第9位 心型桃味糖

心型桃味糖外型相當吸引，而且唔少人都覺得食落桃味濃郁酸酸甜甜，所以有唔少支持者。

第8位 骨頭糖

有2種口味，分別係白色牛奶味同紅色士多啤梨味，咬落煙韌果汁味豐富，不過較多人鍾意牛奶味。

第7位 企鵝糖＋藍白鯊魚糖

企鵝同藍白色鯊魚夾糖雖然好少人第一時間會記得，不過其實同樣受歡迎。企鵝係水蜜桃味軟糖，而藍白色鯊魚則係藍苺味，兩者都外型可愛，非常討人歡心。

第6位 漢堡包糖

漢堡包糖因為造型特別，所以相當經典，不過相比成個食，更多人會鍾意食「包皮」部份。

第5位 薄荷熊仔糖

源自於德國知名品牌Haribo，不過因為薄荷口味最受歡迎，所以好多夾糖鋪只賣薄荷口味。

第4位 酸沙士多啤梨片

另一款士多啤梨夾糖，造型呈士多啤梨厚片狀，食落同樣酸甜，而口感亦比較硬及黐牙，配上酸沙更好咬口。

第3位 香蕉糖

唔少人非常喜歡嘅一款，香蕉形狀食落軟綿綿充滿味，真係好易食唔停！

第2位 酸沙可樂糖

酸沙可樂糖可以話係最大眾化、最多人夾嘅一款夾糖，可樂味重先酸後甜，唔少人都覺得係最好吃嘅夾糖之一！

第1位 荷包蛋糖

估唔到成功擊敗酸沙可樂糖嘅，竟然係荷包蛋糖！不但外型像真度極高非常可愛，而且蛋白帶甜，蛋黃帶酸，食落酸酸甜甜，相當開胃！