Nancy Kwai北海道雪地拍MV　跌廿幾次「仆到膝頭紅晒」

Nancy Kwai（歸綽嶢）去年年中展開四季歌曲企劃，推出代表不同季節的歌曲，分別有春天的《Out of the blue》、夏天的《Let go》、秋天的《Cardigan》，來到最終章代表冬天的《I tried…》。為配合新歌及企劃主題，團隊特別前往日本北海道拍攝MV，這次更是Nancy第一次親身感受飄雪。

Nancy表示，當公司透露今次MV去北海道拍雪景時非常開心。「因為我同落雪好冇緣份，我曾經試過好多次計劃去旅行就係睇落雪，做晒功課天氣預告話嗰段時間嗰度係會落雪，點知我去到就係冇雪落，所以我一聽到嘅時候，係好期待親眼見到落雪嘅畫面，但係一諗起咁浪漫嘅畫面竟然係同同事一齊見到就有啲小傷心，哈哈！當我見到啲雪係天上面飄落嚟，唔知點解有種莫明嘅感動！不過有個小遺憾，就係因為我哋拍攝MV嘅行程都好趕急，所以冇時間可以好好咁感受落雪，冇得砌雪人又無得玩雪戰。」

MV講述Nancy希望透過和男主角相約旅行挽回戀情，可惜最後男主角未有現身，只有Nancy在雪地等待。Nancy表示在MV中最深刻一幕是與男主角去海邊雪地散步：「點知拍攝當日天氣好差，狂風暴雪咁，吹到個頭亂哂，最後我記憶呢一幕係喺一片混亂下咁完成，但估唔到呢幕會係成個MV入面我覺得最好睇、最有感覺嘅一幕。」

Nancy更笑說遭同事整蠱：「MV入面有一幕我係要仆親，我同事話呢幕要一Take過，咁我就做啦，嗰次我覺得我仆得好靚，點知因為我太心急，佢地未roll機，結果我要再嚟過，之後又因為各種拍攝原因又要重複咁拍呢一幕。天氣又大風又凍，我真係「仆」到呆晒，返到酒店發現我兩個膝頭都仆到紅晒，好彩出到嚟效果都幾好，冇白費我仆咗差唔多20幾次嘅心血。」

2月15日生日的Nancy今年撞正要開工，甚少慶祝生日的她卻坦言很期待。她說：「近年我都好少特別慶祝生日，都係同屋企人食餐飯行下街就當慶祝咗，對我嚟講生日最緊要食到好食嘅生日蛋糕，但今年撞正同華納歌手做演唱會好緊張，我又未試過同咁多人一齊過生日，所以我都好期待！」。