「豐山跑」如何成為 Why Not Run?! 嘅起源？
無「豐山跑」的話，可能唔會有 Why not Run?! 嘅出現!
Peter、試跑員二號 Gabriel 同我其實曾於不同時期加入過「豐山跑」，神奇嘅係我哋當時互不熟稔甚至從沒一同上堂，但後來卻成為好兄弟好拍檔，緣份!
「豐山跑」教練 – 張祺豐教練 (人稱KFC) 絕對算係自己跑步路途上嘅啟蒙。
回憶畢業那年到尼泊爾旅行，首次被山野景色嘅壯麗所震懾，為希望擁有強健體魄去征服更多崇山峻嶺，適逢當時參加咗「圖騰跑」活動，遂報名參加由張祺豐教練主理嘅圖騰跑訓練班，更於後來加入咗人生首個跑會 -「豐山跑」。
「豐山跑」嘅訓練大多針對比賽而設，感覺算係一個以比賽為本嘅跑會，每位加入嘅同學都係熱鬥小馬。所以無論大大小小嘅路跑或越野賽，都會見到張祺豐教練帶領其學員們積極參與，置身當中絕對感受到佢哋嗰份熱血。而我亦喺呢度結交到唔少重要好友。
Peter 係最初喺會內認識而後來一齊玩山賽嘅好友。
回帶至疫情期間，所有比賽暫停，得知 Peter 打算 self support 去完成「逆走105公里」，而自己亦希望嘗試挑戰人生首個100公里山賽，但當時自己無論體能同速度均較弱，且對長途山賽毫無經驗，於是決定自薦跟操。仍深深記得每週嘅操練以至挑戰當日，Peter 帶領住我哋一班山友互相鼓勵至最後一齊衝線完成，每次回想起仍然激動熱血。有咗首次經驗，後來便開始陸續參加唔同距離嘅山賽。
Gabriel 嘅認識經過更奇妙。某次「豐山跑」長課操練日，發現跟剛加入不久嘅佢頗投契，言談間聊到自己正打算獨自前往泰國清邁參加 UTMB 系列賽，隨便一問佢有冇興趣同往，卻竟然一口答應 (講堅，當時曾懷疑佢係gay，幾驚，後來證實唔係)。 呢倘泰國之旅令我哋成為摯友，後來更組隊參加毅行者兼成為超級毅行者之列。
Screenshot
大概去年初某天，Peter 突然問我有無興趣拍片，吹咗大半天，「試跑員」?….完全唔知乜春夏秋冬，只知會到各跑會踩場兼訪問，聽落幾刺激幾過癮，兼可以到各跑會觀摩，就答應咗。而 Gabriel 因為靚仔大隻兼跑得，同時對飲食非常講究 (約女仔食飯諗唔到去邊通常都會問佢意見)，後來被 Peter 招攬為「試跑員二號」。就係咁，試跑員一二號正式登場。
人大了，於社會浮沉久了，棱角磨平了，會發覺越難結識真心友，唯獨跑會呢個毫無利益衝突嘅地方，嚟嘅人只為跑個步出身汗，母需虛假不用巴結，跑道上一個眼神一個表情已心照不宣。呢班人當中總有三兩個傻佬願意跟你結伴完成艱苦賽事，亦會同你飲跑食醉癲成晚，難能亦可貴!
張祺豐教練於我跑步路途上嘅指引固然畢生受用，但更彌足珍貴嘅係，若當日無加入「豐山跑」，相信唔會認識到 Peter 同 Gabriel 兩位大佬，估計亦未必會有 Why not Run?! 呢個騎呢組合出現，命運嘅嘢有時就係咁曲折離奇!
雖然老土，但仍願意相信嚟到跑會嘅人大多懷著一顆純潔嘅心，哪管你跑A組B組定C組， 假使有緣碰上一班好好嘅跑友，一班義無反顧support你嘅朋友，務必好好珍惜，娘但真!
作者: 試跑員一號 Ryan
The post 尋找跑會的故事 #08 | 豐山跑 appeared first on Fitz 運動平台.