《我很不愛你》陳健安
喺《戀愛腦之死》對一眾戀愛腦人士當頭棒喝後，安仔今次推出久違嘅慘情歌，道出一個淒美故事。
「我最好不貪不要 不講不唱 收好這情感 承諾我不想一起 不說我們 一說會犯禁」
有種愛係為求彼此關係唔會改變，寧願獨自痛苦，都要隱藏愛意，維持看似舒適自在嘅相處。因為一但將心意講出口，就無得返轉頭，心中知道對方唔可能答應，所以只好保持似近又遠嘅距離，唔會跨越界線，用密友身份先可以一直守護在身旁，永不分離。
「無謂查核我的 無盡心思似繁星 巨浪般情緒 別一夜理清」
心中有無數情緒洶湧，又唔能夠喺對方面前表達，甚至要傾聽愛人分享同別人嘅感情煩惱，默默演好一個樹窿角色，給予情感支援。其實自己同樣如此，加倍難受，但無可奈何，最重要係心上人幸福。
每日只可不停催眠自己並不愛對方，希望能從關係中慢慢抽離，讓內心無咁難受，但要一下子狠心又談何容易。正因為太愛先甘願有如此偉大嘅犧牲，每次否認只會令自己再痛心多一點。
「不必太誠懇 只願你的餘生 有時若洩氣垂頭 仍然有我 無盡頭 拼命等」
明知無結果依然無條件地付出的確好傻，但愛係咪一定要擁有？說到底愛人無非想對方快樂，如果用另一個方式同樣做到，其實都係一種愛嘅表現，學會放手地愛或者係人生必經一課。
「我已經 很很不愛 狠狠不愛 但願別追問」
歌中情節相信好多人都經歷過，深愛一個人，做盡一切卻無法再進一步，甚至眼白白睇住對方同其他人相戀，又捨不得毅然離開，個種遺憾同痛苦絕對刻骨銘心。而MV令成首歌加倍揪心，縱然男主角女曖昧親近，有過美好時光，但開心過後終要面對現實，面對孤單，實在拍得太出色到肉。
「然後 你卻如常 遙遙遠遠 沉悶時 先步近」
安仔一向唔算多唱悲情作，但每首都特別又襟聽。《我很不愛你》演繹上收起咗唔少力量，溫柔地將男孩為愛情奉獻一切嘅心酸唱入心扉，令我聯想到一直好喜歡嘅《厭惡物圖鑑》，同樣用一個故事營造出悲慘感覺，令聽眾更深刻，希望嚟緊可以出多啲依類作品！
「你會否步近 悄悄問 沒回音」
面對深愛但無法走近嘅人，你又講唔講得出「很很不愛」，再狠狠不愛？
《我很不愛你》陳健安
作曲：馮穎琪
作詞：Oscar
編曲：Perry Lau
監製：賴映彤 / 陳健安
「我已經 很很不愛 狠狠不愛 但願別追問
寧願你 天空海闊 當個旅人 不引爆藥引
都 只怕誠懇 坦露我的情感
然後 你卻如常 遙遙遠遠
沉悶時 先步近
你會否步近
悄悄問 沒回音」
▼Follow hkpopculturelover
Instagram: https://www.instagram.com/hkpopculturelover/