那赫爾辛基被遺忘的秋天 六大秋葉打卡景點

講到秋天，你可能會諗起去日本、韓國睇紅葉；講到芬蘭，你可能又會諗到住冰屋睇北極光同去聖誕節老人村。不過你又有冇諗過【芬蘭X秋天】會係咩嘅景像？

黎咗赫爾辛基接近五日，當然唔少得係市內觀光。好多人話赫爾辛基好細，一兩日就已經可以離開。不過今次我預多咗時間，又咁啱遇上芬蘭嘅秋天，好多景點都伴隨大遍黃金樹葉，今次就順便介紹埋赫爾辛基秋天打卡必去六大景點啦！

第六名 Porvoo 紅木屋

建於約800年前，Porvoo係芬蘭第二古老嘅城市。由赫爾辛基市中心出發，大概一個鐘車程就可以去到。去Porvoo主要都睇芬蘭式紅木屋，另外仲可以到山上嘅Porvoo教堂，係一個15世紀的古老教堂。我放係第6位嘅原因係係巴士總站隔離有個公園，又係長滿大片黃葉群，加上Porvoo好少人，我影咗成半個鐘，只有10個人左右經過，絕對係可以影到你心目中嘅黃葉Facebook Profile Picture 。

第五名 赫爾辛基四大教堂

赫爾辛基四大教堂，分別有Uspenskin Katedraali 紅磚教堂、Tuomiokirkko 白教堂、Temppeliaukio Church 岩石教堂、Kampin Kappeli 靜默教堂。

教堂歴史唔多講，今次主題係講黃葉，建議先去紅磚教堂同木教堂，因為二間教堂附近都有黃葉影襯，影出黎嘅構圖好有秋日氣氛。而岩石教堂同埋白教堂附近都有個小公園，生左幾棵大黃葉樹，但係岩石教堂同白教堂都唔會有任何樹葉陪襯。

第四名 Eira、Merisatama、Kaivopuisto Park

排第4位係由Eira Ponke'a the Park、Merisatama Havsparken Park同Kaivopuisto Park三個大公園組合而成，3個公園組成一條好長嘅緩跑徑，兩旁種咗好多樹，其中有好多會轉紅葉。由Eira散步去Kaivopuisto公園都要40分鐘時間，建議黃昏時間沿海邊散步，記得唔好錯過一間咖啡廳叫Cafe Carusel，因為呢間Cafe對正日落位，可以好chill咁過一個寧靜旁晚。

第三名 Sibelius Park

排係第三位係赫爾辛基著名景點西貝流士公園，係最有歴史背景既公園。公園內擺放咗西貝流士雕像同紀念碑同一個由600個白色不鏽鋼音管組成嘅雕像。旁邊有2棵極大黃葉樹，可以影到好多黃葉做背景，前清後朦嘅靚相。附近有間小木屋 Regatta Cafe，佢係Google評論上有4.7分高分嘅Cafe以肉桂麵包聞名，戶外區有好多座位可以悠閒咁飲咖啡，但呢日去到排曬隊就試唔到。

第二名 Töölönlahden Park & Kaisaniemi Park

以上兩個係赫爾辛基市中心火車總站兩旁既公園。Kaisaniemi Park內經常舉辦各種活動，例如世界村文化節、赫爾辛基日音樂會。呢個公園我只行左少部分，不過火車站附近已經見到黃葉四處。

而我係行曬成個Töölönlahden Park一圈，另一個影咗勁多黃葉靚相嘅地方。呢個公園沿路可以經過中央圖書館、赫爾辛基音樂廳、國家博物館等。我晚上再行多一次，街燈打落黃葉到又係另一種美，好似去咗日本欣賞夜景賞紅葉咁。

第一名Suomenlinna Sveaborg (芬蘭堡)

排第一位賞葉熱門地，就係距離赫爾辛基只有18分鐘船程嘅芬蘭堡。要去芬蘭堡好簡單，係赫爾辛基集市廣場邊嘅碼頭就有往來芬蘭堡嘅渡輪，大概每小時有一班船前往芬蘭堡。

芬蘭城堡由200座建築和綿延6公里防禦牆組成，係瑞典王國用黎防禦俄羅斯帝國擴張，於1748年開始建造嘅要塞，以前瑞典人管治就叫瑞典堡，後來芬蘭人取回管治權就改為芬蘭堡，1991年成為世界文化遺產，目前島上仲有900個島民生活。

個人覺得最少要花半日時間係島上，因為芬蘭堡島上可以行到去六個島，要行嘅地方都好多，而且最好早上去，因為下午開始人多，自然有人阻住你影黃葉，小編絕大部分靚相都來自呢個地方。