上星期出咗單一品雞煲火鍋要去美國納斯達克交易所上市，睇報道話該公司截至今年6月底上半年，集團盈利約343萬港元，按年跌超過73%；收入約6,476萬港元，跌18%；計劃發售200萬股，每股發行價4至6美元，料集資約6,240萬至9,360萬港元。如果以高位定價，市值約9.64億港元。
就咁粗略計數，佢哋淨利率5.3%，PE有280倍，唔好理佢估值係咪合理，但呢個淨利率已經好過已經發咗中期業績的3間上市連鎖餐廳：大家樂（3.40%）、大快活（1.0%）、同太興（0.7%），意思即係大家樂做100蚊生意賺3.4元，大快活賺唔夠1蚊，大興更係得7毫子左右。對比下大家樂盈利能力算係比較好，因為佢舊年同期淨利率先得2.79%，雖然今年度中期業績，收入跌1.2%，銷售成本增加接近1%，導致毛利減少16.6%，但由於行政成本慳返1,500萬，再加上交少咗稅，所以賺少咗28%但提高咗淨利率0.61百分點。大快活都一樣，收入減少銷售成本增多，令毛利已經少咗3,000萬港紙，所以傳導到最底淨利率跌到差少少先夠1%。太興就更大鑊，做多咗生意，但員工成本多咗5,600萬，令佢淨利率跌得比大家樂大快活更低。
以往，大家都會認為，經濟差，大家樂大快活呢啲平民餐廳會有防守性，因為大家荷包緊會偏向幫襯呢類餐廳，但現時佢哋一方面受香港人上深圳消費影響，另一方面畀雙餸飯夾擊，價又唔敢加，去過兩間「大」字頭食下午茶，為咗留客，簡直係抵食夾大件，銷售成本上升毫不意外。但人工成本越嚟越貴，2024年度中期業績顯示，大家樂人工成本喺主要成本佔比升1.1百分點到34%，租金成本只係升咗0.9百分點佔主要成本11.7%。所以睇歷史市盈率，佢哋唔算好高，但睇TTM的話就已經唔同講法，截至12月18日，以上3間上市餐飲PE（TTM）係11倍至26倍，唔算平；股息率（TTM）睇落有5.6厘至14.0厘，但利潤跌咁多，佢哋係咪會保持PAYOUT RATIO，無人知。
最尾兜返去一品雞煲火鍋，以280倍PE上Nasdaq，我都希望佢哋成功，咁樣就可以對比出，美國股市好景到真係雞犬升天，港股就積壓咗一大批又平又優質又高回報但無人買的股票。咁就希望政府班官可以花少少時間諗下，點解港股會無人買無氣氛，我哋個資本市場係出咗咩問題。
金缸經
註：專欄作家言論不代表本網立場
密切留意BossMind動向！立即CLS