《爸爸》以第一身角度將一場悲劇搬上大銀幕，震撼人心，絕對係不可多得嘅佳作。大家快啲把握機會入場！
（以下有劇透）
電影最令我深刻係真實感，彷似同依位爸爸一齊面對家人離散嘅心路歷程。一家嘅相處其實相當平凡，只係啲日常大小事，好易代入其中，但結局卻係如此悲慘。依種反差令導演就算無刻意牽動觀眾情緒，觀影過程都不斷湧出心酸之感。
故事最終亦無比一個確實答案，爸爸有否釋懷同原諒兒子，我地唔知道，只知道依個傷口將永遠存在喺父子心中。後段幻想中嘅妹妹攬住爸爸，同埋哥哥返屋企後見到妹妹嘅玩具，兩幕我都睇到眼泛淚光，完場後沉重感覺久久未能散去。
「靈魂被抽乾 殘留著軀幹 從此與未了願同存亡 地老天荒」
劉青雲淡然中爆發各種情緒嘅演繹實在太厲害，完全同角色融為一體。由初得知事件個份難以接受，及後如常生活嘅孤寂空虛，即使表面睇同旁人無異，實際已經壓抑到崩潰邊緣，背負著回憶與思念前行。
同老婆一段情更令人動容，浪漫其實無需大曬金錢，簡簡單單，彼此眼中有大家就足夠。縱然角色遭遇非常殘酷，當中嘅愛卻十分真摯感人。
「空嘆息 心彷似天邊一孤鳥 影孤隻單」
而厚明雖然年紀輕輕就闖下大禍，依個行為顧然大錯特錯，但有好多原因導致悲劇發生，無法避免，其實佢曾經都係一個天真可愛嘅小朋友，睇完電影彷彿對佢產生多一份諒解。蘇文濤依位新演員大有前途！
「骯髒不堪的兇手曾經也是孩童」
電影剪接上用角色視角出發，不同時間線嘅情節穿插其中。縱使部分觀眾認為依個做法散亂，但個人覺得導演喺每個場合都有比足夠線索，仲幾有新鮮感，一點點帶大家拼湊出完整故事。
最後，珍惜眼前人依句話看似老套，電影嘅情況亦有點極端。不過現實中的確有各種原因令你同親友永別，我地唔知幾時會係最後一次相見，唯一可以做嘅就係好好珍惜，不留遺憾。
「快樂只有盡情 及時 橫豎你生命你都無法知 最後一次」
▼Follow hkpopculturelover
Instagram: https://www.instagram.com/hkpopculturelover/