【搵食CONY】日本人氣厚燒班㦸攻港　廚房直擊製作過程

近日又有日本班㦸過江龍登陸香港，落戶銅鑼灣，但主打嘅竟然唔係近排大行其道嘅梳乎厘班㦸，而係厚燒班㦸，究竟會唔會為甜品界帶來新氣象呢？雖然而家餐廳仍在試業階段，但CONY已經急不及待要出擊搵食，仲闖入廚房睇埋製作過程兼同負責人傾過偈，立即同各位fans報告！

這家名為「雪之下」的日本甜品專門店，在大阪、京都及東京擁有七間分店，第一輯《森美旅行團》都有介紹過。近期流行的梳乎厘班㦸著重空氣感，識得「動L」先算係好，但呢度嘅班㦸就反其道而行，大走口感實在又綿密的厚燒班㦸。因為引入品牌的負責人Ian覺得香港已經有好多梳乎厘班㦸店，當中又不乏大牌子，不如帶一啲新意俾大家。

呢度嘅厚燒班㦸足足有4cm高，以日本雞蛋、牧場牛奶及其他日本直送食材製作。原味的「橘子蜂蜜班戟」簡單配以牛油和蜜柑蜂蜜，最能品嚐到班㦸的真味：馥郁的蛋香，口感實在而濕潤，教人滿足。

直擊班㦸製作過程：

日本甜品點會少得抹茶口味？呢度嘅抹茶班戟茶味香濃，配襯香滑忌廉、紅豆同黑豆，口感豐富，不過會蓋過少少蛋香，魚與熊掌不可兼得，冇辦法啦！佢地仲有其他口味，包括特濃朱古力班戟同期間限定口味。

除咗班戟之外，餐廳又主打刨冰，採用天然「軟水」預先製作成不同口味的冰塊，而非單單在刨冰上澆上糖漿，所以味道特別香濃清甜。現時餐應共提供7款口味，包括宇治抹茶、日式咖啡、生黑糖、士多啤梨牛奶、冰島藍莓，以及最特別嘅日本生薑口味。今次CONY試咗生黑糖口味，內藏一個牛奶味雪糕球，連同刨冰一齊食，集幼滑清爽於一身。

雪之下喺日本都有供應多款精緻鹹點，而Ian都帶咗幾款來港，首推「廣島雞蛋三文治」，厚厚的玉子夾在鬆軟的麵包上，而當中嘅黃芥末沙律更加係畫龍點睛，令味道更有層次。

餐廳而家仲係試業階段，供應嘅食物款式唔算好多，Ian解釋引入呢個品牌係因為好欣賞佢地實而不華嘅風格，以及對食物質素嘅堅持，所以想先專注做好招牌款式，穩定質素，然後再陸續加入新口味。繼CONY話，只要好味，就算得幾款食物都會有人keep住encore！

雪之下
地址：銅鑼灣希雲街1-5號地舖
營業時間：星期一至日，下午1時至晚上11時
試業營業時間：下午6時至晚上10時