【搵食CONY】札幌人氣拉麵店登陸香港　最強蝦湯拉麵有乜特別？

最近先介紹完日本人氣班戟店過江龍登陸香港，點知一波未平一波又起，聽日又有來自北海道札幌嘅拉麵店「一幻」喺灣仔正式開幕。勤力嘅CONY當然為讀者率先去試探軍情，睇吓係咪咁值得一試啦。

話說北海道拉麵以味噌、鹽味和醬油三種口味為最大特色，當中又以札幌拉麵與喜多方拉麵和博多拉麵並列為日本三大拉麵，而札幌拉麵以味噌最為知名。之但係「一幻拉麵」以濃郁蝦湯成名，更在短短數年間成為札幌人氣拉麵店，長期都大排長龍。不過，佢哋都保留咗北海道拉麵嘅特色，除咗湯底可以揀原味（純蝦湯）、適量豚骨（蝦湯中加入適量豚骨湯）和濃厚豬骨（蝦湯中加入濃厚豬骨湯底），仲可以揀調味，包括味噌、鹽味和醬油。

師傅首推純蝦湯鹽味拉麵，因為最能夠品嚐到蝦湯鮮味。至於湯底做法方面，師傅會喺熱鍋將秘製蝦油、豬油、蒜蓉和薑蓉爆香，然後加入蝦湯同調味嚟煮湯頭，每碗都即叫即煮，並附有一塊叉燒和半隻溏心蛋。CONY覺得湯底蝦味真係好濃郁，而因為北海道好凍，所以湯面上有一層油保持湯嘅溫度，不過對CONY而言感覺有點油膩。麵條方面有嚼勁，掛湯力足，但略嫌唔夠香。叉燒和溏心蛋不過不失，唔算好突出，反而自家製嘅蝦味麵酥脆卜卜，不但為整碗拉麵提升口感，而且酥香鮮味，幾有驚喜。

另一個驚喜CONY覺得係香港同台灣限定嘅叉燒飯。坦白講，佢個樣一啲都唔吸引，完全係其貌不揚系列，之但係味道的確唔錯，細件叉燒配搭鮮味麵酥，味道好夾，而用福井米煮成嘅飯粒粒分明，十分香甜。

至於小食方面，日本店好受歡迎嘅蝦味飯團都有來港，雖然係凍食，但因為米飯加入蝦湯烹煮，再加入蝦碎製成飯團，味道鮮甜而且蝦味頗濃，值得一試。拉麵店當然唔少得煎餃，不過唔算好突出，正常味道。

一幻拉麵確認會喺4月11日正式開幕，所有拉麵師傅都曾飛到總店受訓兩個月，而創辦人林直樹亦會留喺香港至4月中，確保質素。CONY未試過札幌一幻本店嘅拉麵，唔知道香港係咪做到同當地一樣味道，不過佢哋嘅蝦湯的確濃郁，適合鍾意日本重口味拉麵嘅人士，但就未必係鍾意清新一啲嘅朋友杯茶，而佢哋嘅小食都值得一試。

一幻拉麵

地址：灣仔皇后大道東119號B店

電話：2789 3799