政Whats噏：捲換樓醜聞老公入獄　馮程淑儀署任5年先有得坐正

政府內部今日(27日)終於公布首長級甲一級政務官(D8)嘅皇榜，受換樓醜聞纏身、丈夫馮永業剛被判囚嘅政策創新與統籌辦事處總監馮程淑儀，署任5年後，終於坐正D8。不過，馮程署任咁多年，人工都遲咗加幾年，今年D8特別遲放榜，唔知係咪等埋馮程丈夫馮永業單案有結果，才公布要升正馮程呢？

下月就55歲嘅馮程，一度被視為「AO(政務官)明日之星」，佢喺2014年7月中起出任民政事務局常任秘書長，可算係相當年輕就開始署任D8，AO近年一般署任兩、三年就可以升正，但馮程正正喺2016年爆出換樓醜聞，其後仕途一直停滯不前，至去年馮程調至前身中央政策組嘅創新辦出任總監，但仍未獲升正，即署任D8超過5年，被唔少後輩「爬頭」趕過。政圈一般相信，馮程未獲升正嘅原因，與其換樓醜聞未告一段落有關。

近年皇榜多數喺5月底、6月頭就搞掂，今年原本都特別遲，喺7月中才公布，但其時就唯獨欠缺D8未放榜，政府解釋係因為仲有工序未完成。不過，政圈有聲音猜疑，係咪同馮永業案件未完結有關，亦有政圈中人估計，或者係因為近日修例風波，影響到有啲內部會議未必開得成。

馮永業最終喺本月12日，因一項公職人員行為失當罪名成立，被判監9個月。事隔約兩星期，D8皇榜就喺今日公布，馮程坐正，到底D8延遲放榜同馮永業案件未公布有冇關係，就真係冇人知嘞。

至於其餘獲升正D8嘅政務官，包括商務及經濟發展局常任秘書長(工商及旅遊)利敏貞、政制及內地事務局常任秘書長鄧忍光、發展局常任秘書長(規劃及地政)甯漢豪、教育局常任秘書長楊何蓓茵，以及財經事務及庫務局常任秘書長(庫務)劉焱，全部都喺2017年起署任D8，即係署任兩年已經獲升正，部分遲過馮程入職，即係馮程同後輩職級終於睇齊。

咁遲才公布D8升正嘅名單，到底會唔會影響加人工呢？有知情人士就話，應該唔會，因為通常可以追溯番呢幾個月嘅加幅嘅。不過，可以肯定嘅係，馮程署任咁多年，即係搞到加少幾年人工嘞！

東網網站 : https://on.cc/

東網Facebook專頁 : https://www.facebook.com/onccnews/