王貽興專欄：壞咗嘅人一街都係，只因忽略了出軌的機會成本

安心偷食，全城鬧爆，女的賠上演藝事業，從此成了過街老鼠，復出無期；男的形象盡毀，莫講演唱會，多年好不容易點滴累積回來的好感一鋪清袋，同一天看著偷拍片段裏兩人眉梢嘴角的風騷愉快，以至幾小時後道歉記招的醜陋落泊，痛哭流涕搏同情，實在教人不得不搖頭嘆息，人類總是重複犯錯，早知今日，何必當初？

誘惑不分行業

今時今日，不管是演藝行業，還是其他職業，學我健身教練話齋，做得呢行，一定有異性示好埋身，要食你亦都真係隨時可以食，你肯就有，但問題係，食果陣你有冇諗過有咩後果呢？

冇。十個偷食九個都好似貪污廣告入面咁講，唔會咁撟係我既，邊有咁好彩，個個都抱住僥倖心態，別說後果，甚至連機會成本四個字，都根本完全沒有概念⋯⋯

偷食勿忘機會成本

甚麼是機會成本？機會成本就是，當你貴為天后老公，就算你心理不平衡，覺得女尊男卑，好想搵其他女人響佢地面對重振雄風搵返樽鹽都好，你都要知道，你一旦背叛出軌，你嘅機會成本係咩，一旦出事，你又會冇咗啲咩⋯⋯

香港係個好有趣既地方，你以為啲人鍾意你做戲唱歌，但其實講到尾啲人原來都只係buy你個人，你嘅形象，你有你口講你嘅音樂你嘅演技你嘅道理你嘅使命。

但啲人其實咪又係因為你入屋因為鍾意你，所以咪覺得你啲歌好聽你啲戲OK囉，你唔明呢一點，冇諗過自己個入屋形象咁重要，結果偷食出事，先發現全香港巿民原來九成思想同偽善程度都仲係停留響古時村民要浸人豬籠既level，咁咪出事囉⋯⋯

天后信奉的宗教，講過你甚麼都可以作，但不一定有益處，呢句《聖經》金句既真正潛台詞其實係，你做呢件事如果冇先諗吓個壞處，最後不小心玩壞了，變咗壞掉的人，咁就會畀全港巿民拎你去廢物堆填，循環再用，bye～

唔係個個都有資格條件做壞男人，不過壞咗嘅男人就真係一街都係，畀人玩壞咗既女人，亦都比我哋所以為仲要多。

**Follow us on:

• Facebook: CosmoHK
• Instagram: @cosmopolitan_hk
• YouTube: CosmopolitanHK**