森美哽咽談3年前曾「死裏逃生」 囡囡10字回應暖入心

《霎時再感動》日前播出一集找來森美分享令他感動的往事。森美2019年找任職牙醫的舊同學檢查牙齒時，發現口腔內有色素瘤，如果屬惡性的話，存活率大約只有20%。由於化驗需時，森美驚足幾星期，為免其他定人擔心，他只將此事告訴太太。

森美更指因為擔心自己時日無多，開始思考人生，那段時間又經常坐在子女房門外，觀察子女做功課：「佢哋覺得好奇怪，我記得當時我囡囡仲問我，『爸爸，你做咩坐喺度睇我做功課？』我話我想睇你做功課，但我冇講原因。」說到這裡，森美都不禁眼濕濕，「我成日喺度諗，如果我唔喺度，我應該有啲嘢要教我啲仔女，但係我冇時間教，點算呢？咁我問個女有啲咩想Daddy教你，佢話『冇呀，你陪我食飯就得喇』。」女兒一句說話令他明白父親陪伴子女的重要性。而最後森美得知口腔內的色素瘤屬良性，他亦鬆一口氣。