MIRROR成員邱傲然（Tiger）最近榮升「虎導」，獲邀為今屆鮮浪潮國際短片節拍攝開幕短片《是日精選》，並找來楊樂文（Lokman）飾演男主角。由製作到正式公映，Tiger體驗了擔任導演一職的苦與樂，但他坦言愈來愈喜愛這個工作，更希望日後可以有機會再執導演筒，而身為短片主角的Lokman，則大讚Tiger有導演的風範。
《是日精選》講述黑道車手阿仁喝慣的茶餐廳例湯向來沒加紅蘿蔔，是日碗中竟意外有兩大塊，難道要來的始終還是會來？平日揸車搵食不問江湖是非，這夜看不過眼，為救妙女郎做一晚英雄，卻觸犯了自己的忌諱，是命運使然還是因果報應？影片集合飛車打鬥場面，對初哥來說難度極高，Tiger表示「玩大咗」！「拍攝順利，拍完之後睇片再抽身諗，就會覺得有啲貪心，可能少啲、精啲可能會再好啲，但冇辦法，第一次就好興奮，想將鍾意嘅嘢擺晒落去。」
除了執導，Tiger在前中後期都跟到足，度橋、拍片、打燈、剪片、配樂、調色……全都參與其中，遇到不同崗位的電影工作者，Tiger有感而發道：「呢個行業每一個識位都環環相扣，缺少一個部份，條片就會爭啲嘢。每個人都有Input，會令條片更加豐富。」看過成品後，Tiger十分滿意地說：「成個製作過程我都好開心同享受，因為團隊中個個都好有火，成班前輩唔係返工，真係想做好件事，成個過程可以回憶一輩子。」
經過這次實戰，Tiger自言拍上癮，很期待能有下一次拍攝機會，他更透露已在籌備下一個Project，雖然未算好有方向，但會不斷構思，他表明會多看電影及報讀課程，或者拍戲時遇到不同導演，會多點在他們旁邊看看如何拍戲，亦會主動問對方。「拍完呢條片，發現自己都幾鍾意呢件事，真係好玩！雖然係好大壓力好緊張，但過程真係好Enjoy！」
那麼，在執導下一個影片作品之前，可有想過幫MIRROR兄弟拍MV？Tiger笑言：「要佢哋搵，唔係我話拍就拍，同埋MV / 劇情片係兩個出發點：MV要好商業化，劇情片就未必需要，所以成個方式同System都好唔同，但我好期待有兄弟搵我，我亦會瞓身做！」
身為《是日精選》男主角的Lokman，全程見證Tiger初嚐執導滋味，他大讚好兄弟：「老虎好清楚自己想要啲乜嘢，又以真誠相待所有工作人員，例如燈光師做完個燈俾佢睇，會真係大家一齊研究，然後可能推介少少做法俾佢，唔啱佢心水又會直接講，所以大家同佢夾得好舒服，呢個係佢做導演嘅一個優點，好有自己嘅想法，係佢犀利嘅地方。人仔細細，可以Lead到現場所有人。」
Lokman經過演出《是日精選》後，他發現自己有個死穴。：「打交係弱點，唔係好敢打人，仲未突破到。（有陰影？）唔知呀，我真係好怕打親人。」不過這次除了打人，還要飛車，Lokman在短短4日的拍攝一次過做勻，他表示「賺晒」！作為演員，他當然甚麼角色都想接，因為始終經驗不多，但最有想試的，反而是演女人！Lokman道：「演其他角色都係男仔，演一個女仔完全係第二樣嘢，可以試下例如《翠絲》裡面姜皓文演嘅跨性別人士，又或者係同志角色，都想一試。」
除了Lokman，在《是日精選》中還有MIRROR另外幾位成員李駿傑（Jeremy）、江𤒹生（AK）及陳瑞輝（Frankie）參與演出，他們在片中飾演劫匪，Jeremy為配合角色更破格演鈯，在片中粗口橫飛，Tiger特別多謝Jeremy：「好多謝佢傾力瞓身演出，我都好surprise，佢講得真係好好，佢真係有練過，好純熟，好有嗰陣味道，好開心佢有呢個突破，希望佢多啲呢方面嘅突破，我相信大家都會好鍾意睇。」