MIRROR新團歌上架　12子全身毛變機械人

MIRROR相隔接近9個月再次有廣東話新團歌，〈Hunt You Down〉昨晚上架，配合今次主題，12位成員都變身捕獵者，身上衣服都有動物毛毛，而且更有用新技術化身機械人。

今次〈Hunt You Down〉新歌由T-Ma監製、T-Ma及Jonathan作曲、周耀輝填詞，以捕獵者追趕獵物的決心作主題的歌曲，曲風上亦突顯了這個主題特色，Lokman：「今次首歌相對節奏變化會多少少，rap亦會多過唱嘅部分，另一樣好新鮮嘅係，首歌有3種曲風喺入面。」Edan亦深入為大家導讀，說：「前面好快好刺激好野性好拫，但去到中間突然變咗抒情輕鬆曲風，但之後再入返去原本曲風，今次新嘗試，喺廣東歌都未見過。」Jeremy亦分享了自己第一次聽到〈Hunt You Down〉的感受，道：「第一次聽可能會覺得奇怪，但第二次聽就會覺得轉得好順好特別，同埋呢首歌provide一個好野性嘅風格，係MIRROR未試過，係成熟咗嘅我哋。」Edan也認同道：「係呀，wild啲，自己跳舞都跳得好爽，有種男人嘅味道出咗嚟！好期待跳live俾大家睇！」

最後更會聽到姜濤chok爆唱出「You better run」這一句，而加入這句是他的主意，姜濤說：「其實係借鑑好多團體，喺歌曲最後都會加句句子，強調返成隻歌嘅重點，本身冇諗住係『You better run』呢一句，我純粹向T-Ma提議想加一句說話喺隻歌最後，因為我覺得成隻歌比較惡，喺MV入面我哋係一班狼一班武士，斬殺敵人。」為了呈現各成員談及的man與力度，今次舞步上都給予很大的新鮮感，但同時亦甚有難度，姜濤續道：「排舞嘅力度，都同以往比較唔同，每次都有新嘢俾大家睇下，想俾大家唔同嘅感覺。」Frankie亦補充：「其實呢隻係難跳過之前嗰啲舞，因為啲力好速同埋要好定，再加埋上台要唱埋歌，對我哋嚟講都係一個挑戰，要搬上舞台表演，係難啲成班人一齊去發力。」

舞蹈以外，今次在〈Hunt You Down〉的MV裡，亦加入很多新鮮元素，Tiger介紹：「〈Hunt You Down〉同我哋過去MIRROR其他MV係有啲唔同，當中會有好多CG後期製作，同埋係我哋團歌MV裡面有邀請其他動作演員一齊演出，所以呢個MV絕對值得期待。」Frankie道：「MV裡面有動作成分，好似返去拍攝《12怪盜》。」Jer則要站於高處擺甫士：「對於克服咗畏高嘅我嚟講，係一啲都唔害怕，少少高，但OK，高啲都仲得呀！其實有一個護住我嘅朋友喺度，所以有啲搖晃，如果冇搖晃，正常係唔會害怕。」AK與Alton聯手以壘球棒擊退敵人，AK道：「第一次玩壘球棍係幾過癮，我哋兩個做嘅tricks，Alton嗰個係難啲，同埋我哋好似跳舞記steps咁記，有少少著數，但點都要練，要練點樣好睇啲。」Alton則自爆：「以前有掂過普通直棍，但壘球棍係第一次試玩tricks，未roll機前都試咗好多次，大家好似見到roll機好似好順利好成功，但其實我roll機以外都跌咗好多次。」Stanley使用的武器則是日本武士刀：「今次第一次拍嘢接觸日本刀，都幾好玩，同埋個shot都幾有型，不過始終我哋功底唔同武師出身或者動作演員，而家空閒時間都有上動作訓練堂，希望日後可以接拍嘅類型會多啲。」

Ian提到眾人服裝：「今次套衫，全部人身上都有啲毛，有同其他成員閒聊，安排咗唔同嘅動物角色俾大家，Tiger安排咗老虎，我開頭見到自己有啲動物嘅毛，就扮狼叫，Lokman都可以做狼，因為佢都有扮狼叫。」MV中另外亦有用上3D scanning技術，再配合CG，MIRROR瞬間變成了機械人在場景內起舞，Anson Lo：「今次有3D scanning嘅科技，scan完每個人嘅樣，就可以做到唔同嘅打鬥場面，同埋一啲跳唱嘅scene，用上呢個新科技係好得意同埋好新奇，大家可以估下邊個先係真正嘅Anson Lo，邊個先係3D scanning出嚟嘅Anson Lo喇！」