車路士英超五連不勝，冬季大手筆收購後四戰只得兩分，相信唔少藍軍球迷都對領隊樸達（Graham Potter）心生怨恨。而根據長期採訪車路士嘅記者Simon Johnson嘅消息，車仔高層面對一塌糊塗嘅成績，依然對領隊樸達投下信任一票，比佢繼續帶領球隊。
車仔目前以31分排緊第10名，值得留意嘅係，車仔目前距離前四有14分之遙，而距離降班區只有10分咁大把。「我嘅工作就係要同球隊一齊奮戰，務求改變。球員都好傷心，我哋而家經歷緊艱難嘅時刻。」上仗倫敦打吡輸比熱刺，樸達直接承認責任。
而翻開車路士嘅英超歷史，呢隊波對領隊從不手軟，每每球隊遇上成績低潮，領隊都首當其衝要祭旗。摩連奴、安察洛提、干地等名帥，都試過喺立下戰功不久之後，同球隊分道揚鑣。
用車路士嘅近況嚟評斷樸達冇料到，咁講法對佢並唔公允。要知道，樸達被車路士睇得中，正正係因為佢喺白禮頓資源有限嘅情況下，依然能夠喺練人嘅同時，令球隊保持穩步上揚嘅成績。賓韋治、古古利拿、比素馬、托沙等等低買高賣嘅主力球員，為呢支南部細會帶嚟可觀嘅轉會收益，中途就係喺樸達手下不斷成長，呢度仲未計林迪、卡斯度等等目前仍然喺白禮頓效力嘅球員。
比起好多英格蘭教頭，樸達嘅執教生涯算係多元發展。佢教過大學球隊，做過加納國家女足嘅總監，甚至喺瑞典教過長達7年時間，作為主帥嘅成長之路有別於人，造就佢獨特嘅用人眼光。而正因為呢種眼光同埋敢於求變嘅精神，令佢喺教白禮頓嘅時間，往往能夠透過位置轉型、提攜新人等等方式，用最少嘅資源換取最好嘅收獲。
嚟到車路士，呢度同樣有唔少尚待陪訓嘅年青球員，但樸達所遇到嘅戰績壓力，係佢執教生涯前所未見。而傷患同狀態，絕對係導致球隊成績一落千丈嘅主因。攤開而家嘅陣容，簡迪、佩利錫、艾斯比利古達、史達寧等等都喺二月有傷過，最新有後防領袖泰亞高施華韌帶受傷。
而巴迪斯利、菲歷斯、費蘭迪斯、梅迪歷等等新兵加盟無耐，尚待時間磨合之餘，佢哋全部都係英超新丁，適應節奏絕非一朝一夕嘅事。
今季紐卡素、白禮頓進佔歐洲賽席位區、阿仙奴、曼聯再度燃起重返歐聯嘅希望，日漸競爭激烈嘅英超聯賽，已經唔再喺「Big Six」長期霸佔前六名嘅情況。車路士過去一年連老闆都換埋，成間公司嘅大執位，球隊營運面臨翻天覆地嘅變化。
車路士要保持競爭力，就要比樸達用建立一隊氣氛良好、戰術清𥇦嘅球隊，而呢個目標係要用時間去浸，更何況車仔季中有咁多重要嘅新人。要將所有問題歸咎於樸達一人，未免太過片面。