嵐山是京都其中一個最易呃Like的地方，在竹林叢中影相、渡月橋旁邊飲咖啡等，都是這幾年好多遊客做的事，沒有對與錯，亦沒有俗不俗氣，我自己都做過，都好開心的，但當太多遊人在側邊時，就令這個美麗的景點變得嘈雜了。不過，來嵐山吃點東西還是可以的。
嵐山其中一樣名物是豆腐，幾年前去嵐山時，都吃過一餐湯豆腐。今次提早來到嵐山，決定不去天龍寺和竹林小道，先直接去渡月橋附近吃豆腐料理。
渡月橋旁邊的食店超多人排隊，尤其是賣蕎麥麵那一間，可能因位置對正渡月橋，有靚景睇卦。來到時聽到有位講廣東話遊客話蕎麥麵要排三個鐘，心想: 「你咁都肯排」，我就寧願食完走出去橋邊望風景好過啦。
光顧的「豆腐料理 松枝」就在蕎麥麵後面，都要等位的，攞籌時店員說要等半小時，於是我就真的快快走去渡月橋旁邊，看看河景。
渡月橋的遊人迫到爆，而河邊的% ARABICA咖啡店就依然大排長龍。
我沒有行好遠，只在橋邊望望流水，已經夠舒暢了，企了一陣後，便回去食店門外坐低等候，可能來到的時間尚早，當時還未夠中午，等位的時間比原先估計短，總共等了約廿分鐘便可入座。
坐的位置對住後院，有樹又有櫻花，景觀還算不錯。
相信很少人夜晚去嵐山，這裡大多的店舖都只做午市，松枝午市套餐有三款，同樣都有豆腐，只是配菜不同，我想吃天婦羅，就揀了「松ヶ枝」 (2,980円)，套餐有前菜、京都風菜、小碗、天婦羅拼盤、湯豆腐(或手工豆腐)、蕎麥沙丁魚乾飯、蕎麥曲醬。
前菜是腐皮包著薯仔，手工紮實，上面一塊炸蓮藕更好吃!
京都風的三小碟
小碗也是腐皮包著米粒和雜菜
未上主菜之前，有醬料提供，可以自行調製。
主菜的湯豆腐可選冷熱兩種，個人覺得有火燒著比較有氣氛。
四格豆腐有原味和抹茶，間成美麗的格仔圖案。
其實火並非很大，只不過在烘熱，而令豆腐保持溫度，豆腐味道偏向清淡，但質感順滑。
天婦羅有蝦、茄子和秋葵，做得尚可。
米飯是京都風味的蕎麥沙丁魚乾飯和蕎麥曲醬
整個套餐著實都偏向清淡!
如果想吃精進豆腐料理，未必要來嵐山遊客區，但感受風味還是有這種需要的。在日本旅行無可避免地吃太多壽司和燒肉，來吃一客健康有益的豆腐，就是貪其清淡，順便可清一清腸胃，之後才再有氣力去嵐山景點打卡「呃Like」。
豆腐料理松ヶ枝
地址:京都府京都市右京区嵯峨天龍寺芒ノ馬場町3 (JR京都線嵯峨嵐山站步行約10至12分鐘)
營業時間: 11:00 – 16:30
Google Maps地點: https://goo.gl/maps/CTWvHws3JKbGWMm28
京都｜南禪寺 順正｜特色湯豆腐料理
嵐山・嵯峨野觀光小火車購票網址: 日本京都｜嵐山・嵯峨野觀光小火車車票｜嵯峨ー龜岡區間
請關注飛叔平台:
Facebook專頁: 飛叔生活 Kelvin Leung
Instagram: kelvinyfl
YouTube: 飛叔Kelvin Leung
