愛華頓再度深陷降班漩渦，解僱林伯特後，再聘請曾執教般尼多年嘅桑戴治（Sean Dyche），長年關注英超嘅球迷，對呢位老派教頭一定唔會陌生。但咁樣，就代表愛華頓可以輕鬆護級？我諗未必。管理層欠缺清晰嘅思維，先至係愛華頓連年深陷泥足嘅核心原因。
上季季尾，林伯特帶領下，球隊喺最後關頭成功反底，但唔駛半季又返到熟悉嘅降班區，半季過去，場均1分都冇，甚至連森林都開始上力，拖肥仲未有好轉。自十月主場大炒水晶宮3-0後，愛華頓就未嘗勝果，迫使管理層再度換帥。迎嚟現今班主七年以嚟，第七位球隊主教練。
而林伯最後一場比賽，是輸給同為護級份子的韋斯咸。決定解僱林伯特之前，愛華頓想搵「狂人」比爾沙嚟教，佢同戴治風格迴異，唔同嘅戰術思維，連帶會影響球隊的買人方向，顯示出高層仲未決定想形塑一支點樣嘅球隊。以往喺般尼，戴治身邊冇總監之類嘅角色，變相係獨攬大權，而而家喺愛華頓要比一個冇清𥇦方向嘅管理層head住，合作方式已經係一道難關。
相比起戴治，比爾沙更有一種革命情懷，以往喺畢爾包、馬賽乃至近季嘅列斯聯，佢都好想證明自己嗰套瘋狂迫搶行得通，唔會比現實情況嚟限制自己對理想嘅堅持。而戴治同比爾沙好唔同，戰術相對公式化，同比爾沙之間，可以話係「保守」同「進取」兩種思維嘅分別。喺BigSix年代一直執掌英超中下游嘅般尼，戴治勝在英超經驗豐富，但難談係一位「救亡型」嘅領隊，佢需要時間去建立陣容，而唔係期望佢短期內fix好現有陣容嘅弱點，盡量搶分。呢一點，同比爾沙相類似。
以往喺般尼，戴治主打low block嘅4-4-2，一腳長傳搵到前線球員，快速完成攻勢。而大隻中鋒喺呢個過程佔咗好重要嘅角色，臨近轉會死線，愛華頓仲未喺鋒線有新援，陣中嘅targetman，只有勉強合格嘅卡法路雲，同已經開始步入衰退期嘅朗頓。（補充少少，有小報指紐卡素曾經想將基斯活加入哥頓嘅轉會當中，但最後唔成事。）
睇睇愛華頓陣中，麥尼爾、達高斯基都係般尼嘅舊部，戴治可以以佢哋為出發點，去重組球隊混亂嘅戰術部署。哥頓係愛華頓近幾年嘅天之驕子，防守落力，技術出眾，可以成為係戴治執掌初期嘅重要成員，但偏偏喺戴治執掌嘅同時，愛華頓就將哥頓賣咗出去，甚至想用哥頓轉會賺返嚟嘅£40M，買入車路士中場加拉加，然而愛華頓中場中央根本唔缺人。
睇到呢度，就不禁想問：到底愛華頓今季想點？如果要護級，就要講求季中轉會窗嘅操作，能夠貼合新領隊嘅要求，但而家愛華頓好明顯唔係行緊呢個方向。除非佢哋已經唔再在意今季護唔護級，而戴治都唔介意下季喺英冠幫呢支球隊重頭嚟過，咁就另當別論。