曼城閘衛簡些路（João Cancelo）轉會至拜仁慕尼黑，相信係呢個冬季轉會窗之中，其中一單最突然嘅重點交易，事前幾乎冇乜走漏風聲，而球員喺原球會又唔係完全失寵。
簡些路目前合約到2027年先至完結，接住落嚟會借去拜仁半季，之後拜仁有權以€70M收購，先借後買。以佢近年嘅表現，上半季更加前壓嘅位置，加上28歲嘅當打年齡，理應係球員價值嘅最高點，而拜仁右閘位置有馬沙拿維、帕華呢兩個打到正選嘅球員，又有續漸上位嘅青訓產品史坦尼錫，右閘人數足夠，風格各異，理應可以應付今季嘅需要，點解仲要用咁高嘅價錢，補上一個肯定會霸一個正選位嘅球員呢？
原先位置踢右閘嘅簡些路，近季多以左閘身份為曼城出陣，哥迪奧拿因應佢傳盤皆精嘅特性，安排佢以左閘身份喺中場位置活動，加強球隊中場人手之餘，亦能喺戰術上解放科頓、根度簡入楔禁區嘅空間，使球隊喺夏蘭特加盟之前，都能夠以無鋒陣無持入球量。
簡些路上季幾乎全勤，今季上半季場均踢少15分鐘。左路有尼敦艾基漸入佳境，右路有列高路易斯漸漸上位，令簡些路唔再係非賣不可嘅存在。
拜仁冬季迎嚟荷蘭左閘白蘭特，佢嘅速度同爆發力，同正選嘅戴維斯天差地遠，但至少可以保時球隊一腳傳中嘅質素。嚟緊喺拜仁，預計簡些路唔會係左路有太多出陣機會，反倒能夠同右閘馬沙拿維形成良性競爭。不過，馬沙拿維而家飽受Covid-19後遺症所苦，世界盃完結後一直倦勤，拜仁亦喺德甲連續三場1-1打和，仲未贏波。
拜仁嘅兩閘配置唔係完全對稱，左邊嘅阿方素戴維斯以速度、體能同進攻天賦獨霸一路，相比之下，右路就以慢板細致為主。帕華特守強於攻，會喺戴維斯殺上時留守防線，保持足夠嘅人數應付快反；馬沙拿維就更特別，技術細膩嘅佢會時常走入中場做組織，呢一點同簡些路異曲同工，而簡些路嘅傳球功架更有水準。有簡些路坐陣中場，更可以令哥列斯卡有更多後上禁區嘅機會，增加球隊得分選擇。
呢單交易，拜仁嘅目的係補上馬沙拿維缺陣下，拜仁右路嘅活動能力，並且為帕華特可能離隊做準備。但對曼城嚟講，英超仲有機會反cup，又要兼顧歐聯嘅情況下，經驗豐富而且多才多藝嘅簡些路，絕對有幫助。