秋意漸盛，又係時候搵埋班friends一齊「烚下烚下」。繼重慶火鍋之後，近期又掀起台式養生鍋風潮，不過繼CONY話，養生嘅湯底又邊使去到台灣搵？香港嘅廣式火鍋近年好鍾意用花膠雞鍋，打邊爐前呷一口滋潤湯頭，養生之餘仲好養顏。CONY為大家精選咗以下4間花膠雞湯火鍋店，有冇一間係你心水？
1. 名廚監製平民「肥牛吧」
雖然呢間火鍋店唔喺鬧市旺區，不過都絕對唔可以睇小，皆因佢背後嘅揸fit人係本地名廚陳國強師傅。佢將間舖交畀幾位後生仔打理，自己就退居幕後做「大腦」。選址大埔，原來係因為師傅就住喺呢區，鍾意呢度夠晒人情味，於是想做間平民火鍋。
主打嘅「黃湯鴛鴦花膠雞鍋」用三黃雞、花膠筒、魚肚、螺頭、赤肉等配料熬足12小時，十分香濃，又用上法國Staub鍋奉客，確保湯底夠熱。店內又特設「肥牛吧」，有不同牛的種類和部位掛在櫥櫃，每款即叫即切，特別新鮮。
豐生水起
地址：大埔翠和里5號麗和閣地下F舖
電話：2728 0668
2. 懷舊配料原盅燉湯
呢間火鍋店位於尖沙咀，老闆深明影呃like相對宣傳嘅重要性，喺裝修上花咗唔少心思，大玩懷舊風，好似喺70、80年代屋邨街市前嘅檔仔咁，教人如何不相機食先？
至於食物方面，都有誠意，湯底主打冇味精廣東燉湯，絕對唔比台式養生湯底輸蝕，以原盅燉4小時而成，當中「花膠鮑魚燉烏雞」就最矜貴啦。除咗一般嘅牛肉同海鮮，呢度仲可以搵到好多懷舊食品，好似風乾油鴨脾、老醋花生、蝦子麵及陳皮魚蛋等，完全係由外old school到內！
阿肥火鍋
地址：尖沙咀漆咸道南53-55號嘉芙中心地庫
電話： 2328 7181
3. 復古雞煲翅熬湯
聽個名都知同上一間一樣都係玩懷舊風，不過裝修未算精緻，倒是佢哋嘅花膠雞鍋吸引到唔少回頭客。熬湯底嘅程序繁複，參考咗以往雞煲翅嘅做法，首先要用上數十隻「三黃雞」，熬製逾3小時，期間會反覆將雞撈起，用大鑊將雞煎乾再放回鍋。上枱時放一隻蒸咗個半鐘嘅雞，保證雞肉嫩滑，而花膠就等湯底滾起才放落去，但湯底飲落都已經好重膠質。
火鍋配料比較有睇頭嘅必數即叫即包嘅蟹粉蝦餃王，大大粒好足料，而且爽口彈牙。店內仲有「海鮮檔」，可以挑選生猛海鮮。
大笪地火鍋
地址：旺角彌敦道613號飛達商業大廈3樓
電話：2155 2789
4. 招牌海鮮檔吸like
最後介紹呢間開業4年，喺花膠雞鍋未咁多人做嘅時候，佢哋已經跑出，而家更加係人氣食店，好難book枱。佢哋裝修成一大個海鮮檔，成個街市咁係佢哋最大嘅標記，不過其實佢哋主打花膠雞鍋，用近100隻雞以慢火熬製38鍋湯，再放入花膠，熬足6小時。有咁大個海鮮檔，火鍋配料當然首選海鮮，除咗蝦、蜆、魚片等基本嘢，連瀨尿蝦、鮮鮑魚、螺都有機會遇到。
鮮入圍煮
地址：旺角登打士街43H號登打士廣場2樓
