港產愛情片嘅類型更加係林林總總，就算經歷緊唔同階段，失戀、明戀、熱戀、暗戀等，都總有一套啱你睇！
以下係90年代上映嘅經典港產愛情片，閒時同另一半睇又得，失意時睇一套有同鳴嘅電影大哭一場都無妨！唔知大家耳熟能詳嘅、第一秒就諗到嘅、又或者直情背得出對白嘅港產愛情片又有無上榜呢？
1. 《花樣年華》— 在最美好的歲月 遇上錯配的愛情
講到港產愛情片，一定會諗起王家衛！由王家衛執導、梁朝偉、張曼玉主演嘅《花樣年華》，當中一句「如果有多一張船飛，你會唔會同我一齊走？」，直至18年後都仲有提起！
《花樣年華》講述蘇麗珍(張曼玉 飾)及周慕雲(梁朝偉 飾)各自發現自己嘅伴侶有外遇，其後仲得知原來對方伴侶嘅外遇對象正正就係雙方嘅另一半！同病相憐嘅二人一齊承擔呢個秘密同時，二人亦日久生情，萌生起另一段愛情。
王家衛筆下嘅愛情片非想令人痛哭流涕，反而係令觀眾產生一種心酸、緊張感。蘇麗珍果種由開頭想搶回丈夫，到中段開始感覺自己愛上周慕雲，卻敵不過果種「不能出軌」思想嘅掙扎，真係睇到人心酸又肉緊！
《花樣年華》用間接手法，描寫愛上唔應該愛上嘅人、唔想錯過一個人、唔敢直白表達嘅曖昧等苦苦掙扎嘅感覺，令人不禁毛管戙啊！
2. 《重慶森林》— 默默陪伴卻懵然不知 最天真單純的愛情
而另一套王家衛嘅經典愛情片，《重慶森林》一定上榜！
《重慶森林》分成兩個平行故事，第一個故事由金城武飾演嘅警員編號223何志武，以及林青霞飾演嘅女毒販為主。何志武以為喺愚人節講分手嘅阿May係開玩笑，決定每日買一罐阿May最愛、以及會喺5月1日過期嘅鳳梨罐頭，話比自己聽直至鳳梨罐頭過期一刻，就代表二人之間嘅愛情都已經過期。
《重慶森林》係一套帶住失落又浪漫嘅電影，何志武一次過食曬30罐鳳梨罐頭嘅畫面真係可愛又心痛，到佢入酒吧「決定愛上第一個走進酒吧的女人」，遇上女毒販，呢種職業上嘅矛盾喺王家衛筆下，完全無半點奇怪！
而第二個故事則由王菲同梁朝偉主演，深刻位超多，特別係梁朝偉飾演嘅警員編號663，失戀時喺屋企對住死物講嘢、以及王菲飾演嘅阿菲成日偷入663家中大清潔，再配上《夢中人》背景音樂，果種愛情嘅傻氣、天真，總會令人會心微笑，至今都仲不停翻睇回味！
3. 《十二夜》—從相愛到不愛 其實只需一秒之差
《十二夜》係由張柏芝同陳奕迅主演，短短一套電影，用十二夜講述曬愛情嘅所有階段，一次過經歷相遇、熱戀、冷淡至失戀！
張柏芝所飾演嘅Jeannie，完美演釋一個20歲少女對愛情嘅幻想與稚氣，而陳奕迅所飾演嘅Alan亦帶出一個男性對愛情嘅理性想法，令唔少人產生共鳴！《十二夜》算係少有電影將所有愛情會經歷嘅細節都寫曬入去，睇完之後簡直就好似自己親身經歷咗一段愛情咁！
當中最特別嘅係《十二夜》會為每個夜晚加上一句形容詞，將唔同階段嘅愛情都形容得相當精準！連入面嘅部分對白都係大部分人講過嘅說話，例如「你究竟鍾意的啲咩？」、「你以前都唔係咁！」等等，好有共鳴！
4. 《秋天的童話》— 兩個世界的人不是要放棄 而是努力令雙方站在同一高位
《秋天的童話》絕對係為人熟悉嘅一套電影，成為香港十大最佳電影中嘅第2名，保證未睇過都聽過！
本片由周潤發(飾演 船頭尺)及鍾楚紅(飾演 李琪)主演，講述有目標且心地善良嘅李琪遇上渣男分手後，得到粗魯又做事馬虎嘅船頭尺相伴，繼而萌生出一段感情。
但二人深知大家係屬於「兩個世界嘅人」，所以一直無喺埋一齊，直至李琪離開船頭尺身邊，船頭尺經一番努力後擁有自己嘅餐廳，再重遇李琪。
故事看似美好得唔現實，但同時亦講出「愛一個人必需努力奮鬥」嘅道理！開始時若然處於不同高度，就更應該為愛情努力，站在同一高位下再相愛。
5. 《天若有情》— 最重要的不是門當戶對 而是天淵之別下仍無悔相愛
劉德華成日比人叫做「華Dee」，其實就係出自《天若有情》！
古惑仔華Dee(劉德華 飾)因一次迫不得已嘅綁架，遇上富家女子JOJO(吳倩蓮 飾)，本性善良嘅華Dee不忍之下決定放JOJO回家。
其後嘅突然相遇慢慢種下雙方嘅情感，直至JOJO不斷嘅親近同不離不棄，由本身刻意避開嘅華Dee，變成即使知道大家屬兩個世界，仍決定毅然一博，與JOJO相愛，相當淒美！
其中一幕華Dee打爛婚紗店玻璃，搶婚紗比JOJO，再同JOJO騎電單車到教堂結婚一幕超浪漫又轟烈，真係令人少女心大爆發，更成為電影經典一幕！
6. 《大話西遊》— 悲喜完美結合 相愛卻不能愛
《大話西遊》講落似笑片多過愛情片，但其實當中嘅感情線都令人留下深刻印象，而且仲有超多經典對白！一句「如果非要喺呢份愛上加上一個期限，我希望係⋯⋯一萬年。」，好多人睇完之後都琅琅上口！
除咗上述一句經典對白外，仲有「今日我係嚟將心還比你」、「我嘅意中人係個蓋世英雄，有一日佢會踩住七色雲彩嚟娶我」、「而家我鄭重宣佈，呢座山上所有嘅嘢都係我嘅，包括你」等等，真係睇到人打冷震！
7. 《新不了情》— 只要深愛 便可戰勝一切
《新不了情》可能大家比較熟悉首歌多過戲，由爾冬陞執導，劉青雲、袁詠儀主演嘅《新不了情》，講述阿傑(劉青雲 飾)事業潦倒後被樂觀嘅阿敏(袁詠儀 飾)打動，繼以相愛，卻不幸遇上阿敏骨癌舊病復發。
呢個可歌可泣嘅故事令觀眾流下唔少眼淚，好多觀眾都被深深感動，可謂自虐得嚟又百看不厭！
8. 《甜蜜蜜》— 愛中揭示社會矛盾 非一般的愛情電影
由陳可辛執導，張曼玉、黎明主演嘅愛情電影《甜蜜蜜》，講述嚟自天津嘅黎小軍(黎明 飾)與從廣州到香港生活嘅李翹(張曼玉 飾)離別再重逢嘅故事。
唔止關於愛情，更從中講到有關中港矛盾、移民等社會問題，二人不斷離別與重逢，一直以「朋友」關係相愛，當中仲提到1995年去世嘅鄧麗君。
9. 《胭脂扣》— 苦苦等待 也未必換來修成正果
《胭脂扣》由關錦鵬執導，梅艷芳、張國榮等主演，講述十二少陳振邦(張國榮 飾)以及名妓女如花(梅艷芳 飾)嘅愛情故事。戲中二人雙雙服藥殉情自殺，陳振邦卻幸存在世，如花一直以女鬼身分在人間尋找陳振邦，苦等53年嘅如花終遇見滿頭白髮、生活潦倒嘅陳振邦。
《胭脂扣》除咗情節感人，戲中嘅時空越梭都做得相當出色，強烈帶出香港現代同舊時嘅環境差別！
梅艷芳在戲中嘅一舉一動都相當吸引，無論係飾演名妓定女鬼，都相當有氣質！而張國榮更加唔洗講，戲中嘅陳振邦講嘅一字一話，肯定迷到唔少少女！
10. 《瘦身男女》— 愛情就是互相加勉 擺脫自卑
唔想同另一半睇啲太傷感嘅電影的話，杜琪峰執導嘅《瘦身男女》必定啱曬你！《瘦身男女》係一套浪漫愛情喜劇，講述一對同樣超肥伴嘅男女，由一齊減肥開始慢慢產生出情感，保證劇情搞笑又甜蜜！
就算唔講劇情，鄭秀文同劉德華喺戲中扮演大肥仔肥妹嘅角色，已經好得意，絕對值得一睇！
鄭秀文主唱嘅《終身美麗》就係本片主題曲，入面互相勉勵嘅對白，鼓勵大家勇敢相愛，相信都已經感動唔少人！
唔知你哋心目中嘅經典港產愛情片又有無上榜呢？鍾意睇愛情片嘅朋友記得唔好錯過啦！
圖片來源：Pinterest、影片截圖、劇照
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）