與另一半關係漸趨穩定後，「見家長」就成為最大嘅課題考驗。嚟到呢一步，女生們都少不免會有啲不知所措，唔知點做先可以喺另一半嘅家人眼中留下好印象。其實唔洗將事情諗得太複雜，只要做到以下4件事，就已經好大機會能討得歡心。
#衣着大方得體
第一次見家長時，當然要令人感覺乾淨清爽，大方得體。所以喺衣着方面就要好好下功夫，唔好打扮得過於浮誇，自然嘅淡妝就已經足夠，再配合親和嘅大地色系穿搭就最好不過。當然，亦要注意唔好着得過於性感，以免踩中對方家長地雷！
#事前做好功課
想要討好家長嘅話，當然要事先向另一半問清楚佢地父母嘅喜好、興趣、性格等等，為將來嘅會面做好準備，喺相處時亦可以表現得輕鬆自在，更易令對方父母為你嘅表現加分。
廣告（請繼續閱讀本文）
#準備小禮物
去拜訪另一半嘅家長，就當然要帶埋禮物表達心意。千祈唔好以為隨意送都可以加分呀，最好就事先打聽另一半父母嘅愛好再去購買。另外，亦要注意唔好揀一啲太過貴重嘅禮物，以免俾人一種炫耀財富嘅不佳感。
#戒除碌手機習慣
現代人或多或少都習慣咗喺飯桌上碌手機，打發時間。但與家長見面時，就絕對要避免呢種行為！如果真係有緊要事不得不回覆的話，亦要先向佢地講聲，表現出有禮嘅一面。