想康復香港 點先算合格抗疫者？
武漢肺炎爆發，大家都做足好多唔同嘅防疫措施，勤洗手，多消毒等等。要做咩相信大部分人都好清楚，不過有咩唔做得，大家都一樣要注意，唔係就好容易俾人當港豬啦！今日DailyView用網路大數據調查咗呢十大禁忌行爲，希望大家都無踩中地雷，做個精明抗疫者！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 亂傳假消息，招致人心惶惶（379筆）
依家透過網絡，資訊流通咁快，大家都可以喺短時間內接收到來自唔同渠道嘅最新消息，只不過一旦有消息傳出，都未嚟得切證實真偽，內容就會好快被廣傳，咁都會造成大家不必要恐慌。
早排超市大家紙巾又搶，米又搶，都係因為流傳會缺貨。網友表示未有肺炎，先有「盲搶炎」，唔想執輸就乜都搶定先，絕對唔係一個好嘅風氣呀。
image source:Facebook / 潘小濤
9 非常時期仲要同朋友周圍玩（1457筆）
因爲肺炎嘅影響，好多人新年假之後都無得返工，繼續呢個悠長「假期」，唔係每份工作都可以喺屋企完成，唔少人無工返都無所事事，開始掉以輕心，約朋友唱K睇戲。唔好以爲無同其他人有親密接觸就安全，今次病毒依附喺物品上存活期長，一旦無好好消毒環境，好容易集體出事。網民表示呢啲非常時候仲掛住周圍玩，到時中招真係無得怨！
image source:Facebook/OpenRice Hong Kong
8 不正確使用口罩（1563筆）
武漢肺炎令大家突然變曬口罩專家，開始研究各種口罩嘅唔同等級、標準。口罩防護能力固然重要，但係有無正確佩戴口罩一樣好影響到底係咪真正達到防護效果。例如唔少人飲水、食嘢都直接將口罩拉到下巴位置，但其實咁樣姐係將細菌都食落肚！之前都有誤傳好多資訊，就好似口罩要反轉戴等等，網民就笑呢啲隨便相信以訛傳訛謠言嘅人，完全無fact check，聽人講就信。
image source:Facebook/衞生署衞生防護中心 Centre for Health Protection, DH
7 有病徵唔隔離仲打牌播毒（1591筆）
武漢肺炎病徵較為輕微，甚至有確診者無發燒一樣中招，呢段期間喺公共場所大家咳兩聲、打個乞嗤，都會引起路人側目，當正你係帶菌者。有警覺性大大提高嘅市民，但都有自私嘅人就算明明唔舒服唔當一回事，無意識到嚴重性，相反仲周圍去，馬照跑舞照跳。有指早前進入隔離營嘅人喺入面聚賭，分分鐘隔離變集體互相傳播。網友就話，攞自己條命嚟賭，賭咁大？
image source:Youtube/尤汐伯夷
6 將家居檢疫當放假（2666筆）
今次武漢肺炎嘅病毒，唔少公司實行Home Office，有啲就要求自主隔離14日，確定冇事先可以返工。今次武漢肺炎潛伏期成14日，大家人心惶惶唔知自己有冇瀨嘢。有人因為呢個突如其來嘅Home Office措施當成放大假，一樣出街玩，完全失去本身隔離嘅意義。之前爆出嘅「行山銀行」就係其中一個例子，有網民就話Home Office最重要係大家都有自律性，咁先可以將疫情對日常生活、經濟影響減到最低。
image source:YouTube/ The Communications Authority
5 為重複使用口罩無所不用其極（4049筆）
買唔到口罩，大家就開始發揮想像力同各種科學知識去研究好多重複使用口罩方法，務求一個口罩用到盡，慳得一個得一個。除咗蔣麗芸議員「蒸口罩大法」，紫外線殺菌，裡裡外外噴酒精，相信大家都聽唔少呢啲旁門左道，為求將一個即棄口罩用到最極致。不過根據現時嘅研究，口罩都係即棄式嘅，無謂為咗慳一個口罩令到自己接觸一啲污糟嘅細菌啦。
image source:Youtube/信報財經新聞
4 自私唔戴口罩出門（8966筆）
喺大家搶口罩搶崩頭嘅同時，亦都有一啲堅持唔戴口罩、覺得唔需要戴口罩嘅人，不過呢啲絕對唔係唔怕死嘅勇士，而係一種非常自私嘅表現。唔好諗住你唔驚中招就唔戴口罩，你唔戴萬一惹到病菌，返到屋企又會傳染屋企人同身邊嘅人，令病毒加劇擴散之外，身邊人防不勝防無辜被傳染，而你就成為幕後黑手。所以戴口罩絕對唔係為咗自己一個人㗎，亦都係保護你身邊嘅人。
image source:Youtube/ 有線電視 CABLE TV & 有線新聞 CABLE News
3 參加群體宗教活動（9004筆）
韓國新天地教會出現大規模爆發，每日嘅案例急劇飆升，而香港北角都有佛堂爆出有人確診，令唔少人關心呢啲宗教集會，不知不覺成為傳染武漢肺炎嘅一大途徑。唔少人都好注重宗教信仰，不過呢啲非常時期，就連出街食飯都要避免，大型集會就更加唔使講啦。呢類型集會可以喺短時間之內將病毒快速傳染開去，所以都係可免則免啦，就算有必定要出席嘅活動都記得要戴口罩保護自己呀。
image source:YouTube / TVB USA Official
2 冇警覺性仲一堆人打邊爐（12120筆）
肺炎爆發後大部份專家都提醒市民要避免聚會或者同人哋有近距離嘅親密接觸。打邊爐本身就係一樣高風險嘅行為，大家圍埋一檯食飯傾偈都難免會噴出口水，大部份人打邊爐都唔會有用公筷嘅習慣，特別係屋企人通常都一人一對筷子就一齊恰吓恰吓，可以話係將全部口水聚集埋一齊，令到打邊爐成為一個特別高危嘅活動。萬一一檯人入面有帶菌者，名符其實一獲熟。大家唔好以身犯險喇，留得青山在，以後大把機會打啦。
image source:Youtube/粤语影视fans
1 發災難財炒賣物資（40745筆）
炒股票、炒Figure，炒波鞋，大家聽得多，邊諗到有一日連口罩、消毒藥水，都會俾人炒到咁貴。隨住武漢肺炎蔓延，全球物資供應都變得緊張，好似台灣咁一早就限制口罩出境出口，真係一罩難求。口罩炒到幾百蚊一盒，大家都已經見怪不怪，明知食炒價都焗住買。其實預防措施少部分人做又點會有用呢，環境衛生要大家一齊做好本分先得，部份人囤貨搞到大家都冇得買，唔單止自私亦都係好冇常識嘅行為。
image source:Facebook/ Notebookgod 筆電神
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2020年01月01日至2020年03月03日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『十大防疫「港豬」行為』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
動動 重有為果幾千蚊機票，藉口無得退錢，堅持出外旅遊，去播毒或惹回港再播毒，超無公德心！
去完返黎又覺得自己呢度唔舒服果度發燒，走去睇醫生左驗右驗，比人麻煩重攞黎賤！
2020年03月06日11:28
顯示全部