【時尚CHOCO】瘦面唔使用劍嘅！小髮術幫你靚住過情人節

大家農曆新年係咪食得好開心呢？有冇磅過自己重咗幾多呀？大魚大肉糕糕糕過後，就要面對殘酷的現實，努力極速急救來迎接情人節。講真，其實只剩6日時間，幾勤力都不足以帶來太大轉變……不如從打扮著手，讓小技巧成為你的掩眼法，蓋過新年得來的肉肉感！

CHOCO認為首先要處理的就是髮型，作為大家的第二塊臉，少少改變已經可以讓你瞬間顯瘦，並提升氣質。須知道新年過後，好多理髮店仍未開門，又或者時間太趕未必book得切，所以下面分享的都是可以在家運用到的小髮術，大家多練習找到效果最好的方法就不需節食減肥都可以fit住約會。

微攣增加頭髮比例來顯瘦

除非天生面瘦，否則頭髮筆正地貼在頭上會讓胖胖面形盡顯人前。大家可以用捲髮器把表面頭髮夾攣，略略營造蓬鬆感覺，加厚頭髮的比例來做出瘦面效果。不過千萬不要夾得太多，如果把全部頭髮都整攣，反而會令到整體感覺變得臃腫，成個包一樣。

用頭髮拉長面形

想瘦面的姊妹們好多時都會用大量頭髮左遮右遮，令人感覺異相又瑟瑟縮縮。好好掌握「應露則露」的原則吧，適當地露出前額可以幫手拉長面形又保持到清爽感覺。短瀏海的姊妹不要把前陰平均鋪在額上，中間應留較少髮絲，然後再稍微夾攣，令頭髮充滿空氣感，讓額頭可以在散髮間露出。長瀏海的女生就不妨大膽把前陰吹高，讓它成為額頭的延伸，令包包面變得修長。

紮辮都可以瘦面

紮辮瘦面的原理同樣是利用視覺效果來拉長面形，丸子頭、高馬尾等都好適合姊妹們試試，不過緊記如要達到瘦面效果就要紮高啲，要高到正前方能夠看到才叫合格呀！假如覺得把頭髮全部紮起沒有安全感，可以只綁一半的頭髮，垂下來的頭髮更可以帶來向下延伸的感覺，加強整個小臉效果。