【安心出軌】撐Sammi變同網民開火 蘇永康：咁食花生因住骾親

許志安與黃心穎被踢爆於的士車廂「偷食」，其後安仔開記招道歉，心穎就發文道歉，直至昨日安仔太太鄭秀文開腔發文表態原諒老公，獲不少圈中好友留言讚好，而許志安好友蘇永康亦有畀「心」以示支持，不過就被網民翻舊帳，引發他與網民的罵戰。
事緣有網民在蘇永康的留言下面回應，「話下你老友啦Ｘ」，當時蘇永康未有回應。不過有網民就留言說「佢未（咪）又係同類　有乜資格話」，更有人翻舊帳，指他「結完又離 離完又結 不知所謂。」，令蘇永康憤而留言還擊，直指「呢啲只係我與我太太嘅事用不着妳多嘴，妳咪噏囉！」
有網民即回應他，「不喜歡別人評論，可以不做公眾人物」、「你都識講人地既（嘅）事唔關你事，咁你走出黎（嚟）多嘴做乜呀？蘇永康？who？」蘇永康對網民的留言逐一反擊，「妳有妳生活我有我忙碌⋯祝您青春常駐，合家身體健康⋯⋯講完！」、「咁你又對在下有乜意見呀？願聞其詳。」等，引發與網民一輪罵戰。
有網友更寸爆留言，「大家傾得咁開心，你又可以繼續凸顯你既（嘅）賤格精神，我地（哋）又繼續食花生，多謝你都黎（嚟）唔切添。」蘇永康亦不客氣地回應，「咁食花生因住哽（骾）親呀⋯你返去點燈啦。」，罵戰持續兩個小時，其間亦有網民勸大家不要在Sammi的IG下罵戰。