唔知大家有冇試過，身邊總有一啲朋友好多感情煩惱，每隔幾星期就會俾人追、有人送禮物、同時有兩個男仔Approach搞到唔知點揀……總之佢哋嘅生活圈子就係充滿住狂蜂浪蝶，真係令人羨慕。
廣告（請繼續閱讀本文）
明明自己樣貌身材都唔係輸蝕，點解佢就有咁多桃花，自己就長期單身呢（係呀，明明單身都要被逼聆聽感情煩惱，真係叫人冬天飲雪水）？究竟佢哋有咩特質呢？
細個成為以為化靚靚妝、舉止優雅，再著到成個Lady咁樣，就可以吸引白馬王子嘅目光……完全係錯晒！可能你童年真係睇得太多迪迪尼嘅公主卡通片，斯文的確係優點，但過份斯文就會令人好有距離感。隨住你慢慢大個女，就會發現以前成日俾人取笑麻甩嘅嗰班男人婆，到頭來竟然有最多男仔圍住佢哋轉；相反，你只能夠眼甘甘望住佢哋風流快活。
廣告（請繼續閱讀本文）
男仔頭最大嘅好處，就係可以不知不覺間混進其他女仔難以加入、以男人為主嘅群體。一個男仔頭嘅女仔，可以完全融入男人群嘅生活，飲酒、講粗口呢啲自然不在話下，就連佢哋嘅情史、兄弟關係，你都可以摸得一清二楚。當你成功混入男人群中，由於呢班男人身邊欠缺女生群體，自然就會當你係寶、錫住你、討好你、同你袒誠相對（I mean 著住衫）。當然前題係，你嘅外型依然係一個女人。
廣告（請繼續閱讀本文）
撇除某部份嘅情場精英，其實大部男人都好幼稚；原因好簡單，因為如果係情場精英，一早就唔會留喺呢個男人堆之中覓食。當你成功取得男人們嘅信任，只需偶爾揀幾個人出嚟、單對單食返碟豆腐火腩飯，佢哋分分鐘就會以為自己終於出人頭地，喺一眾（襟）兄弟之中脫穎而出，成功奪得你嘅芳心！當然佢哋唔會知道，其實你同每位兄弟都食過呢碟豆腐火腩飯，不過咁樣又有咩所謂呢？
只不過，男仔頭性格亦唔係話扮就扮到，如果你天生有張高傲臉……試下吊高嚟賣，都可能有意想不到嘅收獲嘅？
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**