夏雨搶視帝成人氣急跌導火線 林峯入行25年 終坐上天王之位？

1. 鄭秀文 世界巡迴演唱會香港站快將結束，講到嘉賓名單中最大反應，不得不提「 陳洛軍」林峯，相關影片在官方頻道點撃率截稿前已近60萬，暫成為眾多嘉賓中最高。

2. 乘電影《 九龍城寨之圍城》逆市破億，成為第二套破億港元的港產片及有史以來香港電影總入場人數第一名，男主角 林峯 成功晉身過億票房男星，人氣隨即急升，近日在 Sammi 演唱會表現更被網民大讚，不禁開post問「林峯係咪已經成為香港天王？」

3. 不知不覺，1999年入行的林峯，今年踏入演藝圈已經25年，早期以拍劇為主，入行初期做跑龍套為主，之後監製林志華賞識，戲份開始增多，自《 尋秦記》飾演贏政開始嶄露頭角

4. 早年有向戴思聰拜師學藝嘅林峯，至2007年才正式簽約英皇做歌手，歌曲以主演劇集主題曲為主，《愛在記憶中找你》、《愛不疚》至今仍成為8、90後熱唱K歌，但卻成了人氣急跌伏線

5. 當年林峯已成為當家小生，2008年於《 溏心風暴 之家好月圓》飾演「管家仔」甘永好一角，成視帝頂頭大熱，但最後由同劇飾演其父的 夏雨 奪得

6. 據知，第一輯《溏心風暴》由 陳豪 奪得視帝，當時已引起夏雨不滿，夏雨於之後的訪問中更自爆「第一集嘅角色係浮誇嘅，而劇入面嘅笑位大部份都係我設計，套劇亦都攞晒所有獎，係我斯人獨憔悴，係無嘅。」不滿到出晒面

7. 之後更稱「第一年喺網上，個個都話係黑幕（夏雨失獎），第二年俾我，令我知道輸其實有好多客觀因素，拎到亦都係因為有好多因素，同埋呢個係累積分嚟嘅，之前大家為我抱不平，下年就會覺得今年再唔俾我，拆咗你個台呀！」更直言拍攝前已跟監製劉家豪講到明恨拎視帝，原來劇未開拍已有人「傾掂數」，林峯注定陪跑！

8. 林峯加入TVB多年，相信都好清楚遊戲規則，而另一方面TVB為息事寧人，視帝就冇，但勁歌獎就狂頒嚟安撫。但當年大眾已質疑林峯在歌壇「捧得過急」，做歌星兩年，hit歌未夠，已進軍紅館開演唱會，更有網民大彈「係唔係愛不疚不同version係咁唱」

9. 之後林峯在TVB勁歌頒獎禮 獲獎速度異於常人，2008年獲男新人獎金獎後，2009年已奪十大勁歌金曲，未知是否失落視帝「安慰獎」，於2010年奪得亞太區最受歡迎香港男歌星，有網民恥笑，「亞太區」其實是指「亞皆老街至太子道西區」，就連作曲家陳輝陽當時接受訪問都話：「樂壇已死，由林峯拎金曲金獎開始」

10. 林峯之後在訪問坦言，自己拎獎時好唔舒服：「我曾要求頒獎單位唔好頒俾我（言下之意即預先知有得拎？），人人都覺得我有後台先有獎，我得獎個心好唔舒服，唔想別人覺得我唔係實至名歸！」陳志雲 之後更稱，係有高層堅持要林峯拎！

11. 要數到人氣急跌嘅最後一根稻草，不得不提之後TVB仍「未識死」，視帝仍然未見影，但繼續在頒獎禮硬捧林峯，翌年繼續頒亞太區最受歡迎香港男歌星，終在2012年憑洗腦歌《Chok》被大鬧下，奪得「金曲金獎」，致人氣大跌

12. 當時一拎獎，即被網民圍攻，自始林峯與「Chok」成為共同體，包括「Chok王」、「「Chok峯」，當年因TVB同四大唱片交惡，沒有出席頒獎禮嘅陳奕迅，都忍不住在微博上載一張拿住《勁歌》獎座扮攞獎的chok樣照片，指：「我chok咗成分鐘都等唔到個特寫……Churrrrr……」明寸林峯

13. 因四大唱片爭議，連同賽果太驚人，《勁歌》頒獎禮聲勢亦明顯滑落，林峯之後連奪男歌星，網民似乎亦感「鬧都廢事」，至2014年林峯離開TVB，之後數年以內地發展為主，延至近年，加盟古天樂公司回港發展，至今年香港才重拾人氣

14. 時隔十年，香港大眾的口味有所轉變，近年亦有不少網民向林峯「伸冤」，「林峯唱歌不嬲都唔差」、「（依家）樂壇係9成人垃圾，五音不全先係問題」、「好過現在既姜濤多多聲」、「林峰以前比人笑到咁，都唔會發網民脾氣」

15. 奧運又到，睇返當年TVB力捧「奧運六星」，黎諾懿及馬國明繼續喺TVB、黃宗澤、吳卓羲內地發展為主，偶爾喺香港出現；陳鍵鋒 幾乎冇影，最站得住腳，似乎係林峯

▼Follow 娛頭
Facebook: https://www.facebook.com/profile.php?id=61554772610166