的士佬自5月起對香港Uber司機發動戰爭，主動放蛇同報警，Uber司機亦無坐以待斃，不停舉報的士違例泊車，呢啲人民鬥人民政府最開心，因為雙方都主動為庫房提供多啲收入，政府多謝都嚟唔切。
的士佬挑起事端，表面梗係話Uber呢啲係白牌車唔合法（但政府亦都無正式話人犯法），又搶咗佢哋生意，令佢哋搵食艱難咗。但係人都知，Uber收費一向比的士高，無車嗰陣重要貴好多，如果真係要搶生意，照計係應該用低價搶，如果大家唔同價位，即係客戶群並非完全重疊。如果巴士港鐵係服務普通客，的士就係服務高端客，Uber就係憑更高價位更好服務，服務更高端客。如果根據的士佬講法，Uber以更高定價更優質服務搶咗的士顧客群，原本顧客寧願畀更多錢享受更好嘅服務，就係顧客選擇服務優先問題。
除咗揸車嗰班，背後發功當然唔少得的士牌主。根據「香港的士交易所」網站資料，近期市區的士牌價大約3球，比2015年中高峰723萬跌約6成，跌咁多梗要搵嘢賴，Uber自然成為最佳藉口。但賴還賴，求真係必須，市區的士牌由2013年見7球後調整，2015年再上一次7球做咗大雙頂，之後就一路跌。Uber喺2014年入場，2015的士牌有再升，所以不能完全賴Uber。
的士牌作為投資工具，以上述網站資料計算，6月7日一宗全新混能市區的士牌成交，成交價311萬元，根據其建議租金每月2.2萬元，以最高成本扣除「燕梳牌費」嗰啲，回報率約6厘。相比盈富基金現時息率不足4%，2023年租樓回報約3%，顯然的士牌回報理論上更高，但的士牌流通性低過股票，重要性不及住屋，而家享受溢價回報，已經算係咁。同埋，香港好明顯要融入大灣區，而家所有比大陸高溢價嘅嘢只會繼續慢慢跌價，收窄價差，如果無任何根本因素改變，降價趨勢會相對緩慢但穩定地進行。所以無論有無Uber，300萬買個的士牌，要考慮嘅就係的士租金係咪企得咁硬，而的士租金有幾硬，就係睇的士服務需求，即係當下經濟情況，同埋車費水平係咪維持到對比大陸嘅高溢價，呢方面亦同未來香港工資水平掛鈎。
就算畀你趕走外國勢力uber，但中國嘅滴滴如果有心再發大嚟搞，甚至其他曹操出行嚟埋一份，競爭情況根本同而家差不多，甚至更惡劣，如果DIDI將來加入戰圈，但佢哋無得再講呢啲外來嘢影響生意，到時又用咩藉口去抵制先？至於的士牌出路，有機會嘅話往後再討論。
金缸經
註：專欄作家言論不代表本網立場
密切留意BossMind動向！立即CLS