俞琤生日｜達明一派合體唱歌賀壽　劉以達回顧當年5分鐘造就神話

商台前高層俞琤（YT）前晚（16日）在中環星級食肆Sevva舉行70歲生日派對，過百圈中好友及名人雲集，其中劉以達與黃耀明合體以「達明一派」唱歌賀好友，派對上唱了《今天應該很高興》，之後明哥還獻唱《春光乍洩》。達明二人在派對後都有上載合照，劉以達則懷緬昔日俞琤5分鐘造就達明一派的香港樂壇神話。

黃耀明昨晚在派對後上載一張與劉以達、填詞人陳少琪及俞琤的合照，他寫道︰「這四個人(其實還包括張叔平)，40年前認識，一起建構達明一派，昨夜我們一起慶祝YT的70大壽。」

劉以達今日再次「方丈」上身，分享當年親身經歷。「1984年秋，我喺音樂雜誌登一個廣告仔搵歌手合作，撮合咗達與明嘅首次會面；1985年春夏之間，達與明開始錄製demo，其中潘源良填詞嘅《繼續追尋》，成為突破機構10週年主題曲，1985年秋開始在電台播出。之後，明仔約咗俞琤，我地兩條𡃁仔戇督督，去到尖東新世界中心。如果你出世得遲，我話你知，新世界中心唔只係當時潮人聖地，仲係集商場、酒店、辦公室、會議室、咖啡廳、健身房於一體嘅一條龍鐵竇，好多大粒明星都住呢度。」

劉以達續說：「俞琤叫我地上去飲杯啡，其實佢係超級大忙人，邊得閒陪我地兩條𡃁仔坐，於是我地把握時間，坐低第一分鐘稍微自我介紹，就打開天窗表明心跡：『我地想入行，試下做一D另類嘅粵語流行曲。』第二分鐘，俞琤就回應：『我聽過《繼續追尋》，好好呀，有獨特風格。你兩個人嘅組合，就叫做達明一派，呢個名係一種祝福、加上一D期許，希望你地堅持風格，自成一派！』」

劉以達繼續回顧那五分鐘，續道：「第三分鐘，俞琤問我地有無簽約，『仲未，淨係派咗demo畀唱片公司。』哦！第三分鐘，俞琤就撥輪，『喂，畫子，咁咁咁……就係咁，兩個後生仔交畀你。』第四分鐘，寶麗金製作部揸fit人關維麟（畫子）已經同俞琤安排好見我地。第五分鐘，見我地仲好似夢遊緊，俞琤就一言嚇醒：『你地如果一事無成，達明一派呢個名就會好造作，你地會受唔起！』

劉以達說經歷過這5分鐘，往後近40年的日子，一直刻骨銘心地記住：「如果一事無成，達明一派呢個名就會好造作，你地會受唔起！如果無呢5分鐘，就無達明一派。適逢伯樂俞琤70大壽，謹此為記。P.S.: 青春殘酷，怎來得及細訴；繼續追尋，仍看不到您蒼老，多謝YT!!」

有份出席的音樂人陳少琪亦有貼出與好友們合照，寫道：「大概85年吧，你為黃耀明和劉以達的組合命名，還有把他們推薦給寶麗金。於是，沒有你就沒有達明一派，也沒有因此而入行的我。後來，由你的引薦下，我們一起為許冠傑、梅艷芳、陳百強等歌星寫歌詞，包括《秋天的童話》主題歌，呂方唱的《別了秋天》。再後來，我也在903工作過。昨夜，朋友重聚了，美酒喝過了，回憶沒遲到。YT，生日快樂。」

派對之後的晚上，今晚黃耀明及填詞人周耀輝在深水埗合舍出席由香港文學生活館主辦的見面簽名會，結果有幾部警車到場，警員要求紀錄在場人士的個人資料，表示收到投訴現場有人阻街，警員到場呼籲現場人士返回店舖，沒有拘捕任何人士。