女顧客遭萬寧便衣保安誣衊偷竊　被箍頸扯背囊拖行50米　據報萬寧炒人致歉

早前一名女網友在社交平台Threads上出文，稱自己到萬寧尖沙咀分店購物後，被兩名萬寧便衣保安誤會偷竊，遭箍頸扯背囊拖行50米。據《香港01》報道指，萬寧管理層得悉事件後，已經親自向事主道歉及慰問，並指涉事兩名便衣保安員經第三方保安公司聘用，並已經被即日解僱，萬寧亦已決定終止與該保安公司之合約。

事主憶述事發經過原文：

「我而家寫呢件事嘅時候隻手仲震緊，亦都忍唔住喊，今朝10:00公司附近間萬寧啱啱開門，我就去買兩盒川貝枇杷膏，因為今日要教兩堂Group Classes想個喉嚨舒服啲。我去咗自助付款儲Yuu積分同埋用八達通俾錢，啱啱開門舖頭得我一個客，其餘有兩個人睇緊嘢，跟住我俾完錢隻手拎住兩盒枇杷膏就行去過馬路啦，大概行咗50米，突然之間有一個女人箍住我條頸另一個女人扯住我個背囊，然後好大聲咁話：你跟我過嚟！你冇俾錢！你偷嘢！佢哋兩個係咁扯住我行，我好驚，我係咁嗌救命，我真係係咁嗌救命。

因為頭先搭地鐵我係戴住口罩嘅，所以我諗緊佢係咪認錯人，所以我掹低個口罩，我話：你係咪認錯人？經過嘅路人都只係望一望冇理我，我喺度諗今次弊啦，我會唔會就咁俾人拉走咗，見唔到屋企人呢？呢兩個女人扯住我入去萬寧，萬寧個經理仲一臉茫然問我發生咩事？

我呢一刻已經驚到喊。好彩我個褲袋袋住張收據，我就同個經理講，我話：點解你會覺得我偷嘢？呢兩個女人扯住我行50米，箍住我條頸，拉住我個背囊，你睇我張收據我係有俾到錢。個經理望一望話係呀，你有俾錢。跟住我話：究竟發生咩事？

跟住我話：究竟發生咩事？你覺得我冇俾錢，你咪問我攞張收據睇囉，唔使扯住我入返舖頭啩。跟住個經理就突然間話，嗰兩個女人係佢哋嘅便衣保安。跟住我話：吓？！佢係你哋嘅同事？咁你一開頭做乜唔同我講話呢兩個女人係你哋嘅同事啊？佢哋又冇着制服，又冇職員證，無端端喺條街度扯住我係咁行，箍住我條頸。我隻手就係攞住嗰兩支枇杷膏，亦都冇鬼鬼鼠鼠嘅意思。你哋嘅便衣保安就等個客行咗50米之後扯返個客入舖頭嘅？其實你只要問我攞張收據，我都可以俾你睇，或者你可以去返嗰個八達通機嗰度，睇返我付款嘅情況。

然後個經理就話原來佢都係啱啱先知佢兩個係便衣保安，有一個男嘅途人見我被兩個女人箍頸扯住入去萬寧，佢就跟住我尾睇吓發生咩事，然後佢見到成件事嘅始末之後，佢就非常好人咁話，願意做我嘅證人去證明呢兩個女人無緣無故用暴力扯我入去舖頭。

我覺得非常震驚，我喺香港土生土長我未試過發生咁嘅事喺我身上。我打去萬寧客服，佢未俾回覆我。我真係以為自己係俾人綁架，同埋當兩個女人同時扯走我嘅時候，我一個人係冇辦法掙扎到。我而家隻手仲震緊個心仲跳得好快，打緊呢篇嘢嘅時候都有喊。」

帖文一出即惹來眾多留言，大批網民狠批萬寧保安做法過份，直指「原來去你哋度幫襯咁危險」、「超級恐怖」。

圖片來源： Threads

《好有脆》專門發掘社交媒體熱門帖文，所有內容及相片版權均屬發布人擁有。