梁思浩向來好敢言，日前他與苑瓊丹和李日朗一同主持網上電台節目《大家「真」風騷》時，大爆有男藝人為了以形補形，生吞貓眼的駭人事件。梁思浩爆料後苑瓊丹亦表示有所聽聞，不過梁思浩就被網民指吹水唔抹嘴，冇證冇據又唔開男藝人名，話係梁思浩炒作居多。
撰文：東方新地 圖片：梁思浩IG、影片截圖
梁思浩爆手法殘忍
梁思浩表示當年在《K-100》看到該名男藝人的訪問，他提到自己會用一種補品令雙眼炯炯有神，不過就以「唔方便講」為由拒絕透露更多。在好奇心的驅使下，梁思浩曾詢問無綫的一個劇務，從他口中得知驚人事件，梁思浩說：「有一次我睇咗個男藝人訪問，睇完後我逢喺電視城見到佢，都會藐佢，賤格！嗰次《K-100》訪問佢，有人話佢拍戲好醒神，佢話係呀，長期保住自己眼神，所以有啲嘢補下，但呢啲唔方便講，佢話每次返國內拍戲，都叫劇組『咁樣咁樣』。當時佢冇好仔細講，之後我問無綫一個劇務，我話上次睇訪問，有冇咁嘅事，你知我鍾意尋根究柢。唔係劇務話我知，我都唔相信呢個世界有人做呢樣嘢﹗」
梁思浩講到七情上面
李日朗聞言問道：「即係點？買狗肉食？」苑瓊丹即說：「我知你話邊個，佢有工具嘅，買支竹然後削尖咗。」梁思浩續說：「佢每次返國內拍戲都叫劇務喺附近買貓仔、中貓，唔要大嘅（貓）……佢有時搵竹，有時搵咖啡匙羹，買咗隻貓返嚟，捏住個頭挖隻貓眼出嚟即食，成對（眼）食。我問過劇務，佢真係睇住佢咁做。」梁思浩繪聲繪影描述該男藝人非常變態殘忍，李日朗聽後抱頭皺眉，忍不住破口大罵：「正畜生！」
苑瓊丹印證真有其事
在旁的苑瓊丹亦說：「我哋同佢開工，大家話唔好瞓覺，一瞓醒就盲咗，好驚呀。」苑瓊丹表示很多人誤信以形補形，她補充：「佢生得忠厚外表，但有奇怪行為，佢唔係匙羹挖貓眼，係用支竹筒『隊』貓眼然後食，佢自己話畀我聽。」
網友轉焦點 質疑梁思浩
梁思浩回應傳媒追問時，拒絕透露生吞貓眼藝人的身份，只強調希望大家不要再虐待動物，而且事件發生多年，這位藝人「仍在生不過已非常年老。」梁思浩言之鑿鑿卻惹來網民狂轟，指他吹水冇句真，不過苑瓊丹亦曾親耳聽聞，似係堅喎！
相關文章：賣甜品賺過億！梁思浩 進駐千萬獨立屋