【方以文問兩句】《教束》賢仔岑珈其訪問

《教束》裡面，我覺得展現得最正嘅係麥浩賢呢個人物，因為觀眾可以見到佢嘅成長：最初不理學校事務上堂瞓覺當交人，之後為咗莊子籌組「不老騎士」選贏學生會，受到盧文達教化去爭取學生權益，自發組織學生反對馬修書院由津校轉直資。成套劇，係麥浩賢成長嘅洗禮同埋見證。出道11年，演過咁多學生角色嘅岑珈其，點樣去塑造賢仔呢個人物呢？

問：今次參與《教束》，同之前演出電影《點五步》有冇關係？
答：你話有冇直接嘅關係就冇嘅。純粹係因為《點五步》嘅導演陳志發 今次喺《教束》做監製，《點五步》嘅編劇黃智揚 Yellow就喺《教束》做導演。《教束》係我自己去搵個 casting返嚟，當其時見到佢哋出post招募嘅，我就自己不斷去問，自己去搵陳志發導演同佢講我好想參與呀，可唔可以嚟casting呀？佢當時係話佢係監製，如果想casting嘅話要搵黃智揚導演，所以我就自己膽粗粗去搵Yellow導演。佢好好，我好多謝佢，因為佢開頭以為我講笑，點知最後佢真係畀我去casting，最後仲畀我參與今次嘅演出，搵我演麥浩賢，我好多謝佢。
問： 雖然呢條問題應該好多人問過你，但都想問吓：又做學生有咩感覺先？認真問：由2008年嘅出道電影《#烈日當空》到依家2019年《教束》，隨住年月增長，你覺得心態上同學生嘅距離會唔會愈來愈遠？抑或仲可以拎到個感覺？
答：演學生咁多年，的而且確會有啲心態上嘅唔同，會覺得自己離學生個感覺愈來愈遠。你話由《烈日當空》到《教束》，成個背景年代都唔好同。2008年嘅中學生同2019年嘅中學生，佢哋面對嘅教育況狀，同埋成個社會嘅問題都好唔同。所以我覺得就算做嚟做去都係學生，但係每次都係特別嘅，每個角色都有佢嘅故事同背景。
今次《教束》身邊嘅對手幫到我好多，不老騎士啦、劉俊謙啦、智叔廖啟智呀，佢哋都令到我可以代入到今次做學生，所以演學生嚟計，今次《教束》我係幾滿意嘅。我係真係好多謝包括之前拍電影《非同凡響》嘅歐文傑導演、《教束》嘅Yellow導演，佢哋都願意搵我做學生，我真係好多謝。我自己都會擔心自己仲做唔做到呀？我仲似唔似呀？佢哋畀咗好大嘅信心我，呢個都幾影響我去演繹呢個角色時嘅信心。

問： 喺一眾學生角色當中，你嘅演齡最長，甚至比起做老師嘅劉俊謙嘅演齡更長。你喺學生群戲當中，擔當啲咩嘅角色？有冇特別帶住其他演同學嘅演員？同劉俊謙都好多對手戲，你哋兩個又點夾？頭十幾集都好似係麥浩賢食住盧sir咁，個關係好鬼得意。
答：今次我諗真係有一種領袖嘅感覺嘅，主要係喺不老騎士嘅時候。 #程人富 有演開網上嘅短片，佢自己都有學drama，而莊子 周漢寧 佢係讀APA。但可能佢哋對電視劇嘅演出就少啲經驗，我哋就會同佢哋分析好多例如係拍攝上嘅程序，或者係一啲演電影電視劇嘅經驗分享。又唔敢講話真係帶住佢哋，因為代入返個角色我係不老騎士嘅會長，喺個過程係好似一個領袖去帶住佢哋，大家係一齊去傾我哋可以點做，或者我哋可以點拍呀，解釋攝影師嘅分鏡係點用。
同劉俊謙係完全冇問題呀，佢係一個好好好好嘅對手，我同佢都好friend，當時我一知道佢係演盧sir我係勁開心，正呀，我同佢可以有排玩。基本上每日去到現場我同佢都係不停搵方法令個戲更加好玩。我哋不斷對戲，又會加啲新嘢，不斷試。有時群戲，劉俊謙都會幫手睇吓點去度。你見到《教束》頭頭麥浩賢食住盧sir嗰個關係，係導演嘅一個方向，佢想劉俊謙係鵪鶉啲，我就食住佢。我哋兩個就夾點去玩，呢個係夾得好開心嘅。我覺得係大家嘅努力嚟，唔係單憑我自己一個去做，係大家都付出，為呢件事好。
問：同周漢寧嘅對手戲都多，你又點睇呢個新人對手？
答：我覺得周漢寧 係一個好叻嘅演員，我都好期待佢，我覺得佢係一個新星嚟。因為佢喺角色嘅拿捏同埋分析狀態，我都覺得佢好好。可能佢讀APA，佢對於角色嘅分析係做得好好，佢係做好多功課。
好多時我唯一同佢去分析或者分享呢，都係提佢一啲拍攝上嘅問題，因為佢做開舞台劇，電視劇演嘅時候佢可能太過投入喺個情緒裡面，有時鏡頭拍唔到佢，我就會同佢講吓拍電視、電影，我哋點樣透過鏡頭去幫到我哋，或者係我哋點樣去幫到攝影師去拍得更加好。
周寧佢好好，好多時都會搵我夾吓莊子同麥浩賢嘅關係。佢係一個好有心嘅演員，我都好鍾意佢，同佢合作得好開心。

問：「不老騎士」無論造型、宣傳MV都好爆，係咪劇組本身已經創作好？演員有冇投入自己嘅創意或者意見令到「不老騎士」更完整？
答：「不老騎士」嘅嘢好多都係導演編劇嘅諗法，佢哋真係好有創意。佢哋每個角色嘅背景、性格都寫得好好，我哋只係將個角色更加立體化、去加強，造就到依家大家覺得不老騎士嘩好正。
每一個人都有佢嘅 character，每一個人都緊守住佢嘅崗位，呢個我覺得係好surprise嘅，因為大家都係第一次合作，我估唔到不老騎士一埋位，大家嘅火花同埋默契係有喺度，唔會話邊個搶邊個戲呀，大家都做好本份，呢樣真係好驚喜。
問： 講返麥浩賢，一個被家人拋棄入住兒童之家嘅中學生。你自己點樣解理同塑造呢個角色？同其他一眾同學相比，佢有咩獨特之處？
答：當時導演同我傾呢個角色，佢都有幫我嘅，因為佢都知道我係咁多個演學生嘅演員裡面年紀最大嘅一個，哈。佢set 咗麥浩賢係喺兒童之家長大，變相佢係比同齡嘅學生會獨立啲、成熟啲，咁對於我以依家年紀去演中學生係有幫助。
角色方面，我覺得麥浩賢都會有一種軟弱，有一種孤獨、寂寞喺裡面，佢自己一個人長大，好渴望家庭嘅愛，變相我就更加容易去拿捏佢同周邊學生，包括不老騎士、莊子嘅關係。佢係孤兒嚟，所以佢睇佢同朋友之間嘅兄弟情會睇得特別重，衍生到劇情後段點解佢會為咗莊子去孭起個偷錢嘅責任，背叛成個學生會。佢係有一個好有力嘅支持。
問：麥浩賢個角色好有趣，由最初為莊子出啖氣去參加學生會選舉，到之後喺「午飯自煮」活動受到啟發，去到第12集佢頂住不老騎士同埋盧sir嘅反對，要為將來嘅師弟妹反對學校轉做直資。成個角色成長過程，你演繹上點處理？導演又畀咗啲咩guideline你？
答：導演同我傾，佢都覺得呢個角色係要有個成長。我哋拍嘅時候好小心，因為頭10集嗰個演繹都係一種似小朋友、貪玩、長唔大嘅感覺，加上麥浩賢係一個好衝動嘅學生，佢選完學生會、面對馬修轉直資，你就會見到佢個改變、成長，慢慢去孭上呢個責任，呢個係導演畀我嘅指引，我哋再去傾。我有喺動作形態上，令到個轉變係再大啲。
導演係好畀空間我哋去發揮，亦都畀咗好多方向我，係夾得好好嘅。導演都講過，佢好想喺個作品裡面，畀大家見到人物嘅成長。呢個我都好buy，其實喺拿捏方面我都好舒服，因為拍戲係跳拍嘅，但我就好清楚知道第幾集，經過啲乜嘢事，心態上有一個咩嘅轉變，喺我演嘅時候拿捏都會易啲，分得清楚麥浩賢整個成長係點。

問：《教束》裡面，你最鍾意 / 最難忘嘅一幕係咩呀？點解呢？
答：我自己有幾幕係最鍾意嘅。其中一幕係拎住個頭盔離開學生會，係好沉重嘅一件事，亦都係釋放自己嗰種灰心出嚟。另一場係我同盧sir喺班房度鬧交，話佢點解當初佢教我去做一個好嘅領袖，依家就反而阻止我。呢幕我係同劉俊謙傾得好多，亦都拍得好開心。
仲有一場我好深刻，係我同莊子喺橋上面走，講畀莊子知道點解唔篤佢出嚟，話畀莊子知麥浩賢當佢係心目中嘅好兄弟，無論如何都撐佢。呢幕係麥浩賢對莊子嘅釋懷，我唔敢講係寬恕，係一個解放。嗰場戲雖然有幾個angle，但導演係盡量令到我哋個情緒唔好斷，去做晒成戲場，係好爽嘅。
問：電影《非同凡響》、電視劇《教束》都有關於本地教育制度，你都參與其中。身為演員，點睇呢類反映教育制度嘅作品？透過電影電視劇去展現同討論社會題材有咩優勝之處？
答：兩套作品都有一啲好值得觀眾討論或者反思嘅地方，當中嘅教育制度或者社會問題係好值得大家去探討。透過電影、電視劇去展現係好好嘅。因為好多時，大眾佢哋透過一啲藝術作品、影視作品去吸收訊息，係往往強過你去做一啲分享討論。好多時如果大家逃避去接受呢啲訊息嘅時候，透過一啲影像，或者佢哋以為睇緊一啲娛樂嘢嘅時候，打入佢哋心裡面嘅訊息嘅力量係更加強。特別係觀眾投入咗劇或者電影裡面嘅角色，佢哋會更加用到佢哋嘅同理心，感受到角色面對嘅嘢，呢個係影視作品嘅優勝之處。
問：下次如果有劇本再搵你做學生嘅話，你希望係一個咩嘅學生呢？
答：如果下次有劇本搵我再做學生，我都會嘗試去做，因為每次演學生都係一個挑戰。可以嘅話，我想佢係一個開心快樂嘅學生，而演繹、角色人物故事背景係合理唔荒謬嘅，代表住現實世界都會有開心嘅社會氛圍同埋教育制度。
我心目中有畀自己一個期限，就係30歳之後可以演更多唔同嘅角色，唔再局限喺學生度。（按：岑珈其1990年出生）
問：之後有咩作品可以見到你嘅演出呀？係咪接住《教束》播嘅《仇老爺爺》？仲有冇咩計劃喺手呢？
合：之後最快見到我就係接住《教束》播嘅《仇老爺爺》，我係客串做游學修嘅好朋友。之後都有一啲電視劇同電影作品，希望可以快啲出街畀大家見到。如果ViuTV嘅話，仲有一個作品係《嘆息橋》。好多謝大家嘅支持，我會繼續加油努力嘅。
撰文：方以文（ ig: @fongemantvman）