秋冬天去露營，在野外看星星月亮，細數2018年的大小事，一起迎接2019的到來吧！好啦，等我們介紹一個性價高，而且可以兩手揈揈、唔使帶營帳的正斗露營地點畀大家啦！
價錢：四月至十一月$24蚊兩日一夜／其他月份$14蚊（抵到爛）景觀：位於國級家地質公園內、大片草地、人造湖！毗鄰天文公園，天氣好的話，夜晚可以睇漫天星斗！設施：可以玩水上活動、可以bbq、有基本煮食爐具至少可以煮即食麵易book度：因為是康文署營地，所以早三個月便要入紙申請！不過呢，因為每晚人數上限為80人，所以經常都唔會滿。而大家係可以在至少三日前，在未滿額的日子隨時「執雞」的（有些日子更會完全無人book，咁你只要湊夠十個人，就可以包晒全場了！）
好啦，講了這麼久，究竟係邊度？開估吧——就係西貢創興水上活動中心了！
～蔗渣價錢，燒鵝享受！～
＞創興水上活動中心位於西貢郊野公園內，萬宜水庫西壩附近，可以順便睇埋雄偉地質。
＞名為創興水上活動中心，就梗係有水上活動玩啦！唔過夜的話，可以參加日營，日營只是盛惠每人7蚊雞咋！每朝九時，會有專車在西貢巿鄧肇堅運動場接載（如果自行搭的士，由西貢入去大約要九十元），下午五時會有回程車。7蚊雞已經包埋車錢。但參加各類水上活動或各式訓練班呢，就要另外收費，因為有教練會從旁指導，大概都係十幾蚊至幾十蚊不等，視乎時間長短，好抵玩。
＞水上活動包括獨木舟、滑浪風帆、水上單車。但參加者須懂泳術。人工湖水面平靜，奇特地質環抱，景色怡人。
＞唔玩水上活動？可以燒烤、打籃球，最正係，可以在草地上露營啊！
＞帳營、工具、睡袋、橡膠地蓆，乜都唔使帶，最適合一家大細，不用花錢買裝備之餘，又唔使「一抽二褦」！啱晒露營初哥，或帶住細路哥。
＞營地全是草地，帳營不用營釘，因為借用的是蒙古包帳營，如果自己帶營，便要用沙包。不懂開營，中心會有職員幫你的啦！
＞綜合大樓內有洗水間，也有更衣室，淋浴也有熱水供應。另外，有基本煮食設施，有電爐、微波爐、雪櫃、流理台等。同咁多人一齊輪流使用。碗碟筷子都有。
＞同日營不同，過夜露營的入營登車時間係下畫2點半，離營就喺第二日中午 12點半。
＞除了簡便的煮食外，這裡沒canteen，也沒有食物賣，但可以預早訂飯盒（喺麥里浩夫人渡假中心送嚟）或燒烤包。
＞這裡夜裡觀星一流！與營地相連的，還有天文公園！天文公園是由康文署轄下的香港太空館管理的。要記得，公園雖然都有草地，但並不屬於可以露營的範圍啊，更加唔可以生火！要生火的話，就要去水上中的指定燒烤爐；要露營，則要去返指定露營地點了。
＞觀星座椅，斜靠上去，就可以用肉眼睇星星。
＞公園入面仲有望遠鏡，不過已經用到殘殘地。有自家睇星器材，就梗係自己帶啦！
溫馨提示：價錢停留在幾十年前，所以預訂手續都停留在幾十年前。早三個月前接受申請，假設你要訂十二月的日子，九月可以開始book啦！你可以先打電話去問問心水日子仲有冇位（電話：2792 6810，上午9時至下午5時，逢星期四休息），然後可以上網下載表格，填寫好之後傳真或郵寄回中心。中心收到申請後，如果人數超過限額（每晚80人），就會抽籤。如果你有幸抽中，先至要寄上支票付款，完成整個程序。如果少於10人，當晚營地就不會開放。
關於「拖手仔去街Guide」：
我們相信生命的美好事物之一，是跟心愛的/親愛的/疼愛的，一起漫無目的去遊玩。玩伴嘛，可以是你的孩子，也可以是你的父母親；可以是你的戀人，也可以你的老死甚至新結識的朋友；當然，也可以是如同家人一樣的毛小孩。於是，我們在2015年底成立了旅遊專頁《拖手仔去街GUIDE》和網站GUIDEGUIDE.HK。 尋找和紀錄了，這個小島無盡的美好風景。後來，我們寫成了《親子200遊》和《親愛52周遊》兩本香港本地遊旅遊專書。
