TVB作為香港人由細睇到大嘅電視台，喺呢度曾經出過唔少影帝，例如周潤發、梁家輝、周星馳、劉德華等，佢哋都係藝員訓練班出身，可見tvb培養出唔少優秀演員。
而電視台臥虎藏龍，仲有好多演技精湛嘅演員未能發揮所長。就好似彭皓鋒咁，你未必聽過佢個名，但相信你一定記得佢個樣。
彭皓鋒1996年加入無綫第九期藝員訓練班入行成為藝人，但一直以嚟都係飾演黑道小混混、大耳窿等角色，佢喺古裝版《皆大歡喜》飾演過4個角色，時裝版就做過5個角色，即係一共有9個角色，可以話係無綫「綠葉王」。
不過彭皓鋒喺無綫16年，只擔任綠葉，角色嚟嚟去去都係差唔多，無咩發揮，所以喺2012年決定離巢，之後去內地發展。
離巢之後，彭皓鋒發展得唔錯，佢喺2016年憑住網絡電影《老師上錯身》獲頒《美國荷里活國際電影節》「最佳男配角」，演技終於獲得認同。
佢攞獎之後激動表示：「做了20年終於有一個真正的肯定。」
舊年彭皓鋒首次擔任男主角，主演網絡電影《破冰》，並憑住呢奪戲勇奪《加拿大金楓葉國際電影節》網絡電影組別嘅「最佳男主角」，揚威國際！
佢話：「21年第一次做男主角可以有這麼好的鼓勵，除了感謝上天，感謝家人，感謝 [加拿大金楓葉國際電影節] 所有評審對我的欣賞，最重要感謝 <破冰> 導演蔡力先生給我演男主角的機會」
彭皓鋒其實仲有一套無綫劇未播，就係《解決師》，佢喺入面飾演澳洲黑幫老大。
入行22年，從未放棄自已嘅演藝夢，一直堅持自己，最終獲業界肯定，小編真係好佩服佢啊！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）