七公主｜黃翠如喪喊演技終獲平反 預告玩味十足迎大結局

TVB劇集《七公主》今（11日）晚迎來大結局，既有長達10分鐘的劍擊比賽，還玩味十足兼極盡視覺震撼效果的結局位。昨晚焦點劇情落在黃翠如飾演的顧靈珊與心魔（陳曉華）對決一幕，最終壓力爆煲的靈珊，遭心魔暴風式數落，無法再強裝硬淨爆煲喪喊，並將壓抑已久的真心話盡情哭訴。
該場接近5分鐘的場口情緒轉換相當頻密，難得翠如亦拿捏得宜，獲網民大讚演技有進步，且有不少網民直認對她改觀：「演技大爆發」、「喊得幾好睇」、「我都有喊，呢Part可以」、「我之前都有留言話翠如演技唔掂，但呢場我覺得佢做得唔錯」、「我喊咗，翠如苦盡甘來」、「翠如今集真係大平反，睇到我眼濕濕」、「演得好好，看得我淚流滿面」、「完全扳回一城」、「翠如真係愈做愈好，特別係今晚呢集，第一集我仲覺得佢超難頂」、「看到眼淚流不停」。
至於靈珊最終會否被暖男小鮮肉Aden（吳子冲飾）打動亦是網民關注重點。在學界有「劍擊王子」之稱的子冲，本身擅長打佩劍，不過重劍及花劍亦難不倒他；加上身高高達187cm，樣貌又乖巧討好，故此演繹劇中暖男Aden角色更具說服力，令網民無限心心眼。
對於角色如此入屋，子冲受訪時坦言很開心：「Aden呢個角色係監製同編審一齊幫我塑造出嚟嘅，要多謝佢哋。我其實只係小暖男，因為鄭子誠先係大暖男！」子冲自言私底下亦算是暖男：「Aden將我嘅暖男特質不斷放大，然後將我嘅缺點全部抹走，佢比我多一份率直同單純。」其實劇中的按摩手法如此有板有眼，全靠飾演子冲同事、本身是專業物理治療師的林景程擔任顧問。