第一次就當選！二十大熱門新進區議員，岑子杰都只係第二

香港人，投票！

因為今年嘅社會運動，唔少香港人都有種「政治覺醒」嘅感覺，積極參與政治活動。以今屆區議會選舉為例啦，投票人數有成2,943,842累積投票人數，比上一屆（2015年）多咗約一倍！睇嚟唔少人都希望以自己神聖嘅一票表達自己嘅立場同政見，喺履行公民義務之餘，仲可以選出啱心水嘅區議員幫自己發聲。不過唔講可能唔知，今年嘅當選區議員有成二百幾位係第一次參選㗎咋！大家未必識晒咁多個，但係你哋應該要識依二十大受網民熱議嘅新科區議員喇。事不宜遲，等DailyView用網路大數據帶大家睇吓佢哋係邊二十個啦！

DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。

image source:

image source:

10 梁灝文(1322筆)

梁灝文當選田景嘅區議員真係可以話係眾望所歸㗎喇！成個選區4個候選人，佢一枝獨秀，超過得票第二多嘅對手成千二票。點解贏咁多？除咗佢由出世住田景住到依家，本住真心想改變田景嘅心態參選，用真誠打動咗街坊之餘，仲打動唔少眼角高嘅連登仔，喺連登開嘅post收獲到超過二千個正評，真係選民不負真心人啊！

image source:Facebook：田景梁灝文

9 岑敖暉（1346筆）

相信唔少人都識得岑敖暉，皆因佢係前任「學聯」副秘書長，近幾年都積極參讓社會運動，時不時都會喺媒體到亮相。依粒閃亮亮嘅政治新星今年第一次參選區議會，就當選咗荃灣海濱區議員，仲要係擊敗咗喺該區已經連任咗28年嘅鄒秉恬，大勝對手超過三千票！收獲咁碩大嘅戰果，岑敖暉真係要好好做，唔好辜負選民！

image source:Facebook：Lester Shum

8 黃兆健（1464筆）

黃兆健係「熱血公民」嘅成員，仲係《熱血時報》到擔任節目主持，健壯嘅身形令到唔少支持者都會親切咁叫佢「大隻仔」。佢今次參選運頭塘區議員嘅呼聲一直都好高，備受唔少街坊同網民聲援、支持，全因佢以前一直都好落力幫運頭塘嘅居民解決問題，大小事都親力親為，全力支援。「大隻仔」當選之後，真係要繼續努力啊！

image source:Facebook：黃兆健 Siu-Kin Wong

7袁嘉蔚（1612筆）

袁嘉蔚係前任香港眾志副主席，參與左好多社會運動，而之前比較多人熟悉就係因為佢係羅冠聰女朋友。自從袁嘉蔚做咗區諾軒議員辦事處南區社區幹事之後，做事親力親為，俾人感覺又靚又乖，深得一眾街坊喜愛！今次參選田灣區議員，何韻詩仲為佢第一次落區拉票！得到咁多人幫忙，感覺佢真係親和力好夠，好適合地方工作！

image source:Facebook：袁嘉蔚 Tiffany Yuen

6 彭家浩（1636筆）

喺香港依幾個月嘅社會運動入面，彭家浩以香港大學學生會嘅代表身份出現於大眾視野，冷靜兼夾講嘢條理分明嘅「港大仔」形象令人印象深刻。佢依個睇落去仲未褪去學生青澀嘅政治素人，著起西裝講佢嘅政綱嗰時，竟然唔比同選區嘅對手差，仲帶有一種年輕人嘅衝勁啊！今次當選西環區議員，應該會為地方帶嚟新氣息啊！

image source:Facebook：Jordan Pang 彭家浩

5 陳振哲（2385筆）

陳振哲依個名聽落好陌生，但當講到「機場大叔」就相信有好多人都有印象。佢喺813機場衝突現場展露嘅勇敢身影，相信大家都歷歷在目。而經網民起底後，大家先發現佢其實相當有料，曾任職四大會計師樓，之後轉行殯儀業，仲係法學碩士。今次佢空降大埔林村參與區選，而佢嘅付出都收穫咗好多支持，贏咗該區連任三屆嘅對手陳灶良！

image source:Facebook：陳振哲 Richard Chan

4 盧俊宇（3342筆）

如果問選區當中邊個最受矚目，咁就真係可以講係盧俊宇，因為佢嘅對手係現任立法會議員何君堯。傳聞佢喺參選期間收過多次恐嚇同跟蹤，俾唔少人威脅退選，但係盧俊宇面對各方攻勢依然堅持不懈，繼續參選，最後係成功當選樂翠區議員，仲俾何君堯勝出1200票！由各方畫面嚟睇，佢當選之際，現場人士係興奮到開香檳慶祝㗎！

image source:Facebook：盧俊宇（Cary）樂翠區專頁 - 海翠花園、啟豐園、美樂花園、龍鼓灘

3 陳易舜（4722筆）

有網民戲稱陳易舜呢個名同歌手陳奕迅同音，不過呢啲笑話講下就算喇，呢個年輕人一啲都唔簡單㗎！佢喺參選之前就就已經落區做咗好多社區工作，而喺藍田呢個佢成長嘅地方，佢發現自己想令呢個地方變得更好，經過幾個月努力，就收穫到平田街坊嘅支持。佢每次同街坊對答都好認真，或者呢個就係佢成功嘅原因，亦都係區議員應該有嘅特質！

image source:Facebook：陳易舜 Eason Chan

2 岑子杰（4994筆）

呢個名對好多香港人嚟講都唔陌生，因為岑子杰係香港民間人權陣線嘅召集人，積極參與社活動。佢係好多香港人，特別係「和理非」非常關注嘅一位香港社運號召者。有啲人覺得佢只係一個遊行召集人，但事實上佢關注好多社會、人權、平權問題。而今次佢直接落區參選，希望扎根沙田瀝源嚟服務市民，好多人都感覺到佢將會帶嚟一番新氣象！

image source:Facebook：岑子杰 Jimmy Sham

1 林浩波（7203筆）

林浩波喺黃之鋒俾DQ嘅選區海怡西擊敗對手陳家珮，引起網民熱烈討論。一嚟係因為依個選區係黃之鋒本來參選但又畀人取消資格嘅地方啦，二嚟係因為對手陳家珮喺之前在任期間，處理一宗街坊自殺事件嘅時候竟然自拍，令到唔少網民唔多鍾意佢。今次林浩波當選海怡西區議員，好多網民同街坊都話「有請小鳳姐」啊！

image source:Facebook：林浩波 Kelvin Lam

分析說明：

本研究資料由《KEYPO大數據關鍵引擎》提供，分析時間範圍為2019年08月29日至2019年11月26日。

網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『區議員新人』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。