廣告（請繼續閱讀本文）
歌手雷深如（J.Arie）接受香港開電視主播馬梓軒專訪，暢談音樂歷程期間，被問及最後悔小時候沒有學哪一種樂器？她坦言遺憾因身體問題，未能學習管樂：「我好想學長笛，同埋好想學色士風，呢兩種樂器我覺得要用到喉嚨聲去吹，但其實我天生有個缺陷，細個嗰陣醫生已經同媽咪講，以後我做任何嘢都唔可以用咁多聲，因為我聲帶本身有兩個腫瘤，到而家都仲喺度，所以把聲係好容易攰同沙！我覺得自己有啲似蘇樺偉，向自己嘅弱點進發，人愈大就反而對用聲愈有興趣，覺得係要發掘多啲！」
入行8年的J.Arie，即將舉行首次個人演唱會，她透露這次演唱會特別之處，是設有年齡限制：「我好想喺今次演唱會裏面，將我呢32年嚟嘅人生，好赤裸咁畀大家睇！成件事可能真係比較本土文化啲，同埋有好多嘢想呈現喺本誠實日記當中，其實我都有幾多歪理同為世不容嘅嘢寫咗入去！經過開完製作會議，主辦方就話，演唱會本身冇呢個規例，但都真係要加番，15歲以下真係唔入得！」
問到屆時會否在舞台上性感上陣，J.Arie笑言：「呢個大家到時入場就會知道，其實都有諗過，我諗呢個演唱會都有幾多唔同嘅突破，包括喺題材、演出、肢體、視覺上，希望做到一個好配合自己性格同想法嘅演唱會！」