Hugo暫別無綫回校園　獲《聲夢》學員送驚喜被嚇窒

21歲、《聲夢傳奇》學員黃奕斌（Hugo）喺無綫機會多多，有指喺新劇度，有38歲嘅李佳芯演佢阿媽，真係羡莫死唔少「宅男」，不過原來佢將暫別無綫，好快就要返內地讀書同拍劇。

日前佢拍完青春歌舞劇《青春本我》後，同期嗰班位學員就搞咗秘密送別會，因為要畀驚喜佢，所以拍晒自己戲份嘅佢，當聽到話佢漏咗拍場好重要嘅戲，文凱婷又鬧佢係「垃圾」時，就嚇到佢呆咗，喺佢個腦不停loop自己漏拍咗邊場重要戲嗰陣，全場學員無端端大唱生日歌又送蛋糕，令唔係生日嘅佢更加𢱑頭，場面超搞笑。

知道被人整鬼嘅Hugo一啲都冇嬲，仲好開心啲學員咁有心同佢搞送別會，個個都話祝佢一路順風，而佢好似生日咁吹蠟燭同許願，之後同學員逐一擁抱，好似個身有陣咖喱味嘅Archie、Yumi、Rock、Aeren、Felix、Sherman等，唯獨係Kaitlyn（林君蓮）唔畀攬，啲學員就話：「蓮姐神聖不可侵犯。」

Hugo就話：「其實我同佢哋講咗好多次，真係好唔捨得，無論啱啱識嘅導演組，全部PA同埋聲夢學員，我返咗內地一定同佢哋keep contact，我會問吓佢哋點樣呀，啲學員又會問吓我喺嗰度返學會點。」

東網網站 : https://on.cc/東網Facebook專頁 : https://www.facebook.com/onccnews/