就咁睇干地近日嘅言論，似乎佢已經準備好同熱刺上上下下「掹面」。
而家係國際賽期，熱刺最後一輪英超比賽南下作客修咸頓，後備上陣嘅佩利錫喺74分鐘射成3-1，但好快被主隊翼鋒禾確特追返一球，最後補時輸十二碼，比修頓隊長禾特包斯絕殺追平。
「場上有十一個球員，自私嘅、唔想幫隊友嘅、無心作戰嘅，統統都有。」干地賽後喺記者面前直接發火鬧球員，直指佢哋冇團隊精神：「對比起上季，我哋今季合作得更差，一支咁嘅球隊根本冇得進步。」
寫稿呢一刻干地依然未被炒魷，但呢次發火鬧人，只係干地同球隊問題嘅冰山一角。對上，干地向來心直口快，有咩不滿就直接講，去到一個位連管理層都唔妥。對下，干地嘅訓練出名嚴厲難啃，試吓代入球員嘅思維，個個星期付出比其他球隊更多嘅汗水，但就連一絲奪冠嘅曙光都未睇到，長遠一定會有負面情緒。
當然，要成為冠軍級球員，就要有冠軍級嘅要求，呢一點正常不過。只不過球隊長年冇成績，操練又攰，踢完又要比教練公開狂鬧，甚至連飲食放肆少少都唔得，我係球員就會諗，我咁搏命做乜？加上同修咸頓賽後嘅言論，火爆嘅程度喺摩連奴時代都未有過，足以成為將帥關係破裂嘅導火線。
誠然，喺英超呢個咁有競爭咁巨大嘅舞台，再強嘅領隊都要有強援加盟，先至可以成就一番大業。熱刺能夠養出簡尼、孫興慜呢啲世界級球星，長年處於聯賽強隊之列，但就係差一個冠軍去證明自己。喺球隊見到曙光嘅時候，球隊偏偏顯露度縮嘅本性。
干地2021/22球季半途回流英超之時，熱刺高層就承諾有成績就會bump水買人，而嗰半季熱刺由一片混亂去到保住前四，算係開咗個好頭，但係收購上只係小修小補。要講得上成為干地長期主力嘅，係干地加盟後幾個月，冬季轉會窗來投嘅古路錫斯基、賓坦古，佢地都未算係頂級球星。干地時代最貴收購李察利臣，今季爭唔贏主力位。
干地係一個冠軍級教頭，但喺熱刺嘅營運風格之下，佢冇辦法將手下嘅一班頂級球星，帶到「冠軍級」嘅水準。球員冇心踢，個責任又喺領隊身上，再陷入不斷換帥嘅循環中。始終都係要管理層有正確嘅思維，先可以真的幫到熱刺。
兩年前摩連奴帶領熱刺僅排第七，已經聞到魷魚香，歐霸盃出局成為了導火線，終在聯賽盃決賽前被炒。今次干地咁大動作，唔知個大信封幾時到佢手呢？